Danııa óz alańynda des bermedi

Osy jyldyń naýryz aıynda óz elimizde ótken oıynda jerlesterimiz búkil álemdi tańǵaldyryp, azýly «Dat dınamıtin» 3:2 esebimen tize búktirip, tamasha kambek jasaǵan edi. Bul oıynda otandyq fýtbol jankúıerleri men sarapshylar jerlesterimizden jeńis kútpese de, bir ǵajaıyptyń bolaryna úmit artyp, kem degende syrt alańda teń nátıjege qol jetkizetinine senim bildirgen edi. О́kinishke qaraı, bári biz oılaǵandaı bolmady. О́z jankúıerleriniń aldynda oınaǵan danııalyq fýtbolshylar bul joly osaldyq tanytqan joq. Árıne, bul jeńiliske Qazaqstan quramasynyń bapkerler quramyn da, fýtbolshylaryn da esh aıyptaı almaımyz. Olar jeńis úshin baryn saldy, biraq qarsylastyń Danııa ekenin umytpaýǵa tıispiz. Álem fýtbolynda endi-endi eńse tiktep kele jatqan Qazaqstan quramasynan danııalyqtar ekinshi ret, onyń ústine óz alańynda jeńiletin bolsa, bul kún Dat fýtbolynyń tarıh jylnamasyna qara tańba bo­lyp basylyp, jankúıerleri bul je­ńilisti ómir baqı umytpaıtyn edi. Namysqa tyrysqan Kasper Iýlmann shákirtteri bar-joǵy eki dop aıyrmasymen ǵana jeńiske jetti.

Kopengagendegi matchqa deıin fýt­bol mamandarynyń kóbi Danııa Qa­zaqstan quramasyn bul joly qal­paqpen uryp alady, Astanadaǵy jeńilistiń kezdeısoq ekenin dáleldeýi úshin bul básekede iri eseppen jeńedi, tipti qazaq fýtbolshylaryna óz alańyndaǵy jeńisi úshin pushaıman jegizedi degendeı batyl pikir bil­dir­gen edi. Biraq bizdiń fýtbolshylar sol fýtbol sarapshylarynyń bol­jam-josparynyń kúl-talqanyn shy­ǵardy. Jerlesterimiz ekinshi taım­da esep aıyrmasyn qysqartyp, Shmeıhel qorǵaǵan qaqpaǵa jıi shabýyl jasap ketkende danııalyq jankúıerler­diń demin ishke tartyp, «apyraı-aı, qazaqtar birinshi golyn soqty, endi taǵy da kambek jasap ketpeı me eken?» degen oımen matchty sońyna qaraı mazasyz kúıde tamashalaǵany júzderinen anyq baıqalyp turdy.

Matchtan bir saǵat buryn alańǵa shyǵatyn fýtbolshylardyń tizimi jarııalanǵanda Adıev bar nazaryn Danııaǵa emes, bul matchtan birer kún­nen keıin ótetin fınderge qar­sy oıynǵa aýdarǵanyn dereý túsine qoıdyq. О́ıtkeni qurama kapıtany Ashat Taǵybergen, qaptaldaǵy qor­­ǵaýshy Iаn Vorogovskıı, Aslan Darabaev sekildi negizgi quramnyń oıyn­­shylaryna demalys berip, Dos­ma­ǵanbetov, Qaıyrov sekildi qosal­qy quram oıynshylaryn birinshi mınýttan bastap oıynǵa aralastyr­dy. Sondaı-aq Mogamed Adıev bul oıyn­da ult­tyq qurama tizginin ustaǵaly beri birinshi ret úsh shabýylshymen oınady. Taktıkalyq turǵyda jıi qate­lese bermeıtin bas bapkerdiń bul jol­ǵy júrisi de óz jemisin bergen sııaq­ty. Qarsylastardyń alǵash­qy mınýt­tardan bastap shabýylǵa den qo­ıyp, qorǵanysqa basa mán bermeıti­nin boljap, qarsy shabýyl­da da bir nátı­je shyǵarýdy oılas­tyrǵan edi.

Kezdesýdiń alǵashqy jarty saǵa­tyn jerlesterimiz jospardaǵydaı ótkizdi dep aıtýǵa bolady. Birinshi gol soǵylǵanǵa deıin qorǵanystaǵy da, shabýyldaǵy da jigitter óz mindetin abyroımen atqaryp jatty. Tek oıyn­nyń 36-mınýtynda alań ıeleri standart jaǵdaıdan gol soǵyp ketkennen keıin jerlesterimiz oıyndy ýysynan shyǵaryp alǵandaı boldy. Krıstıan Erıksenniń asyrǵan pasyna Ioahım Andersen birinshi jetip, alańnan shyǵyp bara jatqan dopty áriptesi Ionas Vınnge dál jet­kizdi. «Volfsbýrg» klýbynyń jas shabýylshysy tepken dop eki qor­ǵaýshymyzdyń ortasynan ótip, qaqpa torynan tabyldy. Al birinshi taımǵa qosylǵan qosymsha mınýtta Robert Skov alań ıeleriniń basymdyǵyn arttyryp, komandasyn úziliske 2:0 esebimen shyǵardy.

Ekinshi taımda Mogamed Adıev alańǵa Abat Aıymbetovtiń ornyna Ashat Taǵybergendi, qorǵaýshy Tımýr Dosmaǵambetovtiń ornyna Iаn Voro­govskııdi shyǵardy. Bul, bir jaǵynan, fınderge qarsy oıyn aldynda Aıym­betovke demalys berý jáne Taǵy­bergen men Vorogovskıı babynda bolý úshin berilgen múmkindik edi. Sondaı alańnyń ortalyǵynda dop ustap, qaptal arqyly shabýylǵa jańa lep berý boldy. Kezdesýdiń ekinshi bóligi bas bapkerdiń jospary bo­ıynsha ótti. Degenmen ekinshi taım bastalǵan bette Robert Skov ekinshi márte kózge túsip, esepti ulǵaıta tús­ti. Arada on mınýt ótkende Iаn Voro­govskıı oń qaptaldan Baǵdat Qaıy­rovtyń asyrǵan dobynan keıin esep aıyrmasyn qysqarta aldy. Biraq ári qaraı bizdiń jigitterde gol soǵatyn múmkindik bolǵanymen, match sońyna deıin oıyn esebi ózgerissiz qaldy. Osylaısha, Qazaqstan quramasy syrt alańda Danııa quramasyna 3:1 esebimen jol berdi.

Sondaı-aq bizdiń toptaǵy ózge oıyn­darǵa toqtalar bolsaq, Slove­nııa óz alańynda kelesi qarsylasy­myz – Fınlıandııany 3:0 esebimen tize búktirse, Soltústik Irlandııa San-Ma­rı­nony da dál sondaı eseppen jeńdi. Jetinshi týrdan soń N tobynda Slovenııa men Danııa quramalary kezekti jeńisinen keıin 16 upaı­men kósh bastap, Qazaqstan men Fın­lıan­dııadan (12 upaı) tórt upaıǵa alǵa uzap ketti. Soltústik Irlandııa alty upaımen besinshi satyǵa jaıǵassa, altynshy oryndaǵy San-Marınoda soqyr upaı da joq.

17 qazanǵa josparlanǵan segizin­shi týrda jerlesterimiz syrt alańda Fınlıandııamen kezdesse, Danııa San-Marınoǵa, Soltústik Irlandııa Slo­venııaǵa qonaqqa barady.