AQSh-tyń Tehas shtatyndaǵy Rozenberg qalasynda uıymdastyrylǵan kásipqoı boks keshinde jerlesimiz IBF nusqasy boıynsha chempıondyq belbeýdiń ıesi germanııalyq Vınchenso Gýalterıdi (22-1-1, 7 KO) sulatyp salyp, orta salmaqta qos belbeýdiń sý jańa chempıony atandy.
Osydan birer jyl buryn elimizdegi boks jankúıerlerin «eger alda-jalda Gennadıı Golovkın qolǵabyn shegege ilse, onyń oryn kim basar eken?» degen suraq mazalap, osy suraqty áleýmettik jeliler arqyly otandyq jáne sheteldik boks mamandaryna tótesinen qoıatyn. Sonda boks sarapshylarynyń basym bóligi dál sol mezette jaqsy judyryqtasyp, kózge kórinip júrgen boksshylardyń esimin ataıtyn. Sol tizimniń bel ortasynda Jánibek Álimhanulynyń da aty-jóni turatyn. Endi, mine, Jánibek óziniń keshegi jarqyn jeńisinen keıin Golovkınniń laıyqty izbasary ekenin, muhıttyń arǵy betinde onyń ornyn jaqyn jyldary joqtatpaıtynyn dáleldedi. Endi boks jankúıerleri «Jánibekten keıin kim shyǵady, Álimhanulynyń áleýetinen kim asyp túser eken?» degen suraqqa bas qatyrady. Golovkınniń ornyn kim basady degen suraq osymen támam!
Byltyr tamyz aıynda ǵana ataqty amerıkalyq boksshy Demetrıýs Andrade orta salmaqtaǵy WBO nusqasynyń chempıondyq ataǵynan bas tartqannan keıin Jánibek Álimhanuly bul tujyrymnyń jańa chempıonyna aınalǵan edi. Arada birer aı ótken soń ol Las-Vegastaǵy jarysta Denzel Bentlıdi upaı sanymen jeńip, alǵash ret óz ataǵyn sátti qorǵady. Al mamyr aıynda qandasymyz 27 jastaǵy kanadalyq Stıven Batlermen judyryqtasyp, orta salmaq chempıonyna laıyq ekenin taǵy bir márte búkil álemge kórsetti. 2014 jyldan beri kásipqoı boksta kanadalyq 37 kezdesý ótkizip, 33 ret jeńiske jetken, 26 qarsylasyn merziminen buryn jeńgen tájirıbeli boksshy bolatyn. Sondaı-aq ol úsh ret jeńilip, taǵy bir básekede teń túsken. Tipti 2017 jyly Gennadıı Golovkın men Saýl Alvares alǵashqy jekpe-jegin ótkizgen kezde dál osy Batler «Kanelonyń» sparrıng-seriktesi bolǵan.
Osyndaı azýly qarsylaspen qolǵap túıistirgen otandasymyz kanadalyqtyń ataq-dańqynan esh qaımyqpaı, Stıvendi nebári ekinshi raýndta sulatyp salǵan edi. Álimhanuly áýeli qarsylasyn eki ret nokdaýnǵa jiberdi. Birinshi nokdaýnnan keıin-aq Batlerdiń beti qaıtyp qaldy. Biraq tóreshi kanadalyqqa taǵy biraz judyryqtasýǵa múmkindik berdi. Arada sanaýly sekýndtar ótkende Jánibek apperkot soqqysymen qarsylasyn eseńgiretip aldy da, sol qolymen qulaq-shekeden urdy. Nokaýt!
Osy jekpe-jekten keıin orta salmaqtaǵy biraz boksshy otandasymyzben judyryqtasýdan qaımyǵyp, túrli syltaýdy jeleý etip, Jánibekten qasha bastady. Álimhanuly da ataǵy joq boksshylarmen judyryqtasyp, bosqa ýaqyt ótkizip alýdan ózin aýlaq ustaıtynyn, tek chempıon boksshylarmen ǵana judyryqtasýǵa nıetti ekenin aıtty. Orta salmaq chempıondary beldigin tastap, ózge salmaqqa «qashyp» jatqanda, bıyl ǵana IBF nusqasy boıynsha álem chempıony atanǵan germanııalyq Vınchenso Gýalterı Jánibekpen judyryqtasýǵa nıetti ekenin bildirdi. Izdegenge suraǵan degendeı, Álimhanuly bul aıqasqa qýana kelisti.
Qazaqta «ótkelde at aýystyrmaıdy» degen ataly sóz bolsa da, Jánibek táýekelge baryp, osy aıqastyń aldynda jattyqtyrýshysyn aýystyryp, bul kezdesýge jańa bapkerdiń qol astynda jattyqty. Jekpe-jek aldynda amerıkalyq jýrnalısterdiń otandasymyzdan ne úshin bapker aýystyrdyńyz degen suraǵyna bylaı jaýap bergen edi: «Men Djeıms «Baddı» Makgırtten ózime kerek dúnıeniń bárin aldym, maǵan endi jańa nárselerdi úırený kerek. Sondyqtan bapker aýystyrdym. Jeksenbi kúni meni jańa qyrymnan tanısyzdar».
Iá, bul jekpe-jekke Jánibek jaqsy daıyndyqpen kelgen edi. Gong úni estilgen betten Álimhanuly alǵa umtylyp, bastapqyda djeb soqqylarymen qarsylasyn sharshatýǵa tyrysty. Arasynda Gýalterıge de óz ónerin kórsetýge múmkindik berip, bir barmaǵyn búgýli ustap júrdi. Osydan-aq jekpe-jek merziminen buryn aıaqtalatyny belgili bola bastady. Besinshi raýndta Jánibek qarsylasyn aýyr soqqysymen bir ret eseńgiretkenimen, germanııalyq boksshy tez esin jıyp aldy. Biraq altynshy raýndqa kelgende otandasymyzdyń birneshe qaıtalanǵan soqqysynan keıin rıngtegi tóreshi Gýalterıdiń densaýlyǵyn oılap, jekpe-jekti merziminen buryn aıaqtaýǵa májbúr boldy. Tehnıkalyq nokaýt!
Osylaısha, Jánibek Álimhanuly bir jyldan sál asa ýaqytta orta salmaqtyń eki birdeı altyn beldikti ıelengen qazaq boksshylary arasynda úshinshi kúrzi judyryq ıesi atandy. Olar kimder deseńiz, birinshisi, árıne, Gennadıı Golovkın, ekinshisi – jeńil salmaqtaǵy Janat Jaqııanov.
