Oqýshy esebinen bızneske jol joq

Oblys ákiminiń birinshi oryn­ba­sary Nurlan Ábdirahym Al­ma­ty oblysynyń bilim sapasyn arttyrýdyń 2023-2029 jyl­darǵa arnalǵan aımaqtyq jol kartasy bekitilgenin, soǵan sáı­kes jan-jaqty jumystar júrgi­zilip jatqanyn tilge tıek etti. Vedomstvo basshysymen ótken kez­desýde depýtattar ótkir de ózek­ti máselelerdi alǵa tartty. Onda keıbir ashanalardyń talapqa saı emestigi, tamaqtandyrýdy uıym­dastyrýdaǵy kemshilikter, oqý­shy­lar tasymalyndaǵy júrgi­zý­shiler jalaqysynyń mar­dy­m­­syzdyǵy, sportzal, pán kabınet­teriniń jetispeýshiligi men jab­dyq­talýyndaǵy olqylyqtar, mektepterdegi meıirbıke tapshy­lyǵy syndy birqatar máseleni ortaǵa saldy.

– Bizdiń mindetimiz – óskeleń urpaqty qaýipsiz jáne jaıly ortada jan-jaqty damytýdy qam­tamasyz etý. Mınıstrlik negizgi máselelerdi sheshýde jer­gilikti atqarýshy organdy qoldaýǵa daıyn. Bilim berý ınfra­qurylymyn damytýmen qatar, oqytý sapasyn arttyryp, tárbıe jumystaryn kúsheıtýge, sondaı-aq bilim berý uıymdaryn biliktiligi joǵary kadrlarmen qamtamasyz etýge erekshe kóńil bólinedi, – degen Ǵanı Bektaıuly depýtattar saýalynyń aıaqsyz qalmaıtynyn, máselelerdiń oń sheshim tabýy nazarǵa alynatynyn aıtty. Son­daı-aq vedomstvo basshysy bala­lardy oqytý men tárbıeleýde otbasy men mekteptiń ózara baılanysyn nyǵaıtý, pozıtıvti ata-ana mádenıetin damytý, eń bas­tysy, balanyń esebinen bıznes jasaýǵa bolmaıtynyn aıryqsha atady.

Budan keıin Oqý-aǵartý mı­nıstri mektep parlamentiniń kóshbasshylarymen kezdesti. Olardyń qatarynda djıý-djıt­sý­dan 7 dúrkin álem chempıony Jibek Qu­lymbetova, «Slavıan bazary-2023» jeńim­pazy Sher­han Arystan, halyq­aralyq jáne respýblıkalyq olımpıa­da­lar­dyń júldegerleri boldy. Kezdesý barysynda oqýshylar mı­nıstrge ózderin tolǵandyratyn suraqtaryn qoıyp, jetis­tik­teri jáne bolashaq maqsattary týraly aıtyp berdi. Oqý-aǵartý mınıstri oqýshylardy jaqsy oqýmen qatar, tabandylyqqa, maqsatshyldyqqa shaqyr­dy. Jiberilgen qatelikten qoryqpaýǵa, kerisinshe odan sabaq alyp, qaıtalamaý qajettigin qu­laǵ­dar etti. Aradaǵy emen-jar­qyn dıalogten soń Sherhan Arys­tan «Moldabaıdyń ánin» áýeletse, mınıstr de qolyna dombyra alyp, balalarmen birge «Ana týraly» ándi shyrqady.

Eske sala keteıik, quqyq pen tártip, aqparat, sport jáne salamatty ómir salty, ózin-ózi taný jáne baqyt (psıhologııa), qam­qorlyq (eriktiler), mádenıet jáne óner (mýzykalyq, kórkem shyǵar­mashylyq), pikirtalas qozǵa­lysy, ekologııa jáne eńbek syndy 8 fraksııadan turatyn mektep parlamenti – oqýshylardyń bilim berý uıymynyń ózin-ózi basqarýyna, oqý-tárbıe úderisin uıymdastyrý kezinde týyndaǵan máselelerdi sheshýge múmkindik beredi. Oblys boıynsha 34 myń oqýshy qamtylǵan 434 mektep parlamenti jumys isteıdi.

Saparda Ǵanı Beısembaev óńir turǵyndarymen, ustazdarmen de kezdesti. Oblystyq bilim bas­qarmasynyń basshysy Saltanat Bespaeva baıandama jasap, bilim salasynyń damýyna jan-jaqty qoldaý baryn atady. Bıyl bilim salasynyń bıýdjeti 323,1 mlrd teńgeni qurap, ótken jylmen salystyrǵanda 42,5 mlrd teńgege artyp otyrǵanyn mysal etti. Sonymen qatar negizgi baıandamashy óńirdegi úsh aýysymdy mektepter máselesin joıý jolyndaǵy josparlardy tarqatty. «Memleket bas­shysynyń bastamasymen qa­­byl­danǵan «Jaıly mektep» ult­tyq jobasy aıasynda 53 mektep salý josparlanǵan. Bıyl 26 mekteptiń qurylysy bas­taldy. Aldaǵy jyly 27 mek­tep­tiń irgesi qalanady. Osy­laı­sha, óńirde úsh aýysymdy oqy­tý men oqýshy ornynyń tap­shy­­­­ly­­ǵyn tolyq sheshý kóz­de­­lip otyr», dedi basqarma bas­shysy.

Basqosýda oblystyq bi­lim salasynyń ardagerleri men kol­ledj, depar­tament basshy­la­ry­nyń usynys-tilekteri tyń­dal­dy. Kezdesý barysynda mınıstr sapaly bilim berý men tár­­­bıe­niń tizginin teń ustaý qa­jet­tigine nazar aýdart­ty. Oǵan óńir­diń aqsaqaldar alqasy­nyń qo­sar úlesi zor bolmaq. Sondaı-aq pedagogterdiń kásibı damýy jáne bilikti­lik testileýin ótkizý erejeleri sóz boldy.

– Memleket basshysynyń ti­keleı qoldaýymen 2019 jy­ly pe­dagog maman­dyǵynyń már­te­besi bekitildi. Muǵalim­der­diń ja­­la­qysy kóterilip, jumys jaǵ­daıy jaqsardy. Artyq fýnk­sııalar­dan bosatylyp, kásibı damý múmkindikteri qarasty­ryldy. Mınıstrlik attestattaý júıesin jetildirip jatyr. Biz bilim berý júıesin úzdiksiz damytý úshin bar jaǵdaıdy jasaýymyz kerek. Ár muǵalimniń eńbegi oqýshynyń jetistikterimen baǵalanýy kerek dep esepteımiz. Ol úshin Ult­tyq platforma bazasynda muǵa­limderdi attestattaý úderisin avtomattandyrý jumystary júrgizilip jatyr. Ol obektıvti jáne ashyq bolýǵa tıis, – dedi Ǵ.Beısembaev.

Aıta keteıik, Almaty obly­synda 33 myńǵa jýyq pedagog jumys isteıdi.

Mınıstr buǵan deıin buqara­lyq aqparat quraldarynda tal­qylanǵan rezonanstyq másele­lerge toqtalyp, ondaı faktilerge jol bermeı, oblystyń barlyq aýdanynda aqparattyq-túsindirý jumystaryn kúsheıtý jóninde tapsyrma berdi. Sonymen qa­tar qyrkúıek aıynan bastap mı­nıstrlik 2023-2025 jyldarǵa ar­nalǵan Birtutas tárbıe baǵdar­lamasyn qabyldaǵandyǵyn eske salyp, onyń erekshelikterine toq­taldy. Sapar sońynda sala basshysy óskeleń urpaqtyń bilimi men tálim-tárbıesine jaýap­ty ustazdarǵa zor senim artyp, eńbekterine sáttilik tiledi.

Almaty oblysy