Mamandardyń aıtýynsha, tamyz aıy men qyrkúıektiń ortasyna deıin topyraqqa 170 mm ylǵal sińgen. Jaýyn-shashynnyń mol bolǵany sonshalyq, tipti keı kúnderi ylǵal mólsheri ádettegiden 7-8 ese asyp túsken. Tabıǵattyń mundaı tosyn qubylysymen dıqandar sońǵy 36 jyldan keıin ǵana betpe-bet kelip otyr.
Jergilikti sharýalardyń kóbi bıyl arpasy men sulysyn kúzdiń qara jańbyry bastalmaı jatyp erte jınap alǵan. Qazir sol alqaptarda topyraqqa túsken dán ónip, kóktep, kóterilip, kóktemde ekken egistikten de jaqsy jaıqalyp tur. Mysaly, Naýyrzym óńirindegi sharýashylyqtyń sulysy dál osylaı boılap ósip ketipti. «Biraq bul suly pisip úlgermeıdi. Dál osy qalpynda oryp alýǵa da, mal jaıýǵa da bolady. Biraq qazir qarbalas naýqan júrip jatyr. Moıyn burýǵa ýaqyt joq. Bar kúsh-qýatymyzdy alqapta qalǵan bıdaıymyzdy jınap alýǵa jumsap jatyrmyz», deıdi sharýashylyq basshysy.
Osylaısha, bıylǵy kúz eginge qolaısyz bolǵanymen, tórt túlikke jaıly bolyp tur. Tipti osydan bir jarym-eki aı buryn shabylǵan shabyndyqtar da qaıta kóktep jatyr. Qysqy shóbin qamdap alǵan soń, sharýalardyń birazy ádette shabyndyǵyn mańaıyndaǵy qarapaıym halyqtyń malyna bosatyp beredi. Qazir qoldaǵy maldyń deni osy kók maısa shabyndyqtarda jatyr. «Kádimgi kóktem sııaqty. Bul endi shabylmaıdy ǵoı. Degenmen, mundaı otqa jaıylǵan mal qysqa qońdy kiredi. Jańbyr jaýyp, aıaǵy aıazǵa ulasyp, muz bolyp qatyp qalmasa, bul shóp qysta jylqynyń tebinine de jaqsy bolady», deıdi malsaq aǵaıyn.
Qostanaı oblysy
