Týrızm jáne sport mınıstriliginiń málimeti boıynsha, sary qurlyqtyń basty básekesinde elimizdiń atynan 131 sportshysy sporttyń 14 túrinen túrli-tústi júldege talasyp kóredi. Atap aıtqanda, otandastarymyz para jeńil atletıka, bochcha, para paýerlıftıng, shahmat, para júzý, para velosport, para dzıýdo, para kanoe, voleıboldy otyryp oınaý, para taekvondo, para sadaq atý, para ústel tennısi, akademııalyq esý jáne para oq atý sııaqty sport túrlerinen synǵa túsedi.
«Para Azııa oıyndary 2010 jyly Qytaıdyń Gýanchjoý qalasynda uıymdastyrylǵan sary qurlyq básekesinen bastap ótkizile bastady. Azııa oıyndarynan keıin jalaýy jelbireıtin paraazıadaǵa Qazaqstan quramasynyń sportshylary 2010 jyldan beri turaqty qatysyp keledi. Bıyl da elimizdiń atynan 131 sportshy 14 sport túrinen synǵa túsedi. Baıraqty básekede para sportshylarymyz úzdikter qatarynan kóriný úshin memleket tarapynan barlyq jaǵdaı jasaldy. Bıyldyń ózinde ulttyq qurama sportshylary 40-tan asa sporttyq is-sharaǵa, 30-dan asa oqý-jattyǵý jıyndaryna qatysyp, biliktiligin shyńdady. Endi osyndaı jaýapty sátte aıanyp qalmaı, jankúıerlerdi jeńispen qýantady degen oıdamyn. Sportshylarymyzǵa sáttilik tileımin!», dedi Týrızm jáne sport mınıstri Ermek Marjyqpaev.
Jazǵy Azııa oıyndarynda júlde alǵan sportshylar men olardyń jattyqtyrýshylaryna berilgen aqshalaı yntalandyrý syılyqaqysynan para sportshylarda qur qalmaıdy. Iаǵnı paraazıada chempıony atanǵan sportshyǵa memleket tarapynan 10 myń dollar, kúmis júldegerge – 5 myń, qola medal ıegerine 3 myń dollar kóleminde qarjylaı syıaqy tabystalady. Sonymen qatar altyn medal ıegerin jarysqa daıyndaǵany úshin onyń jattyqtyrýshysyna – 5 myń, kúmis júldegerdiń bapkerine – 3 myń jáne qola júldegerdiń jattyqtyrýshysyna 2 myń dollar kóleminde aqshalaı yntalandyrý belgilengen.
Jeksenbi kúni Hanchjoýda shymyldyǵy túriletin sary qurlyq jarysyna Azııanyń 43 memleketinen 4 myńǵa jýyq sportshy qatysady dep josparlanǵan. Olar sporttyń 22 túrinen jalpy sany 564 medal (paralımpıadalyq sport túrinen – 490 jáne paralımpıadalyq emes sport túrinen – 74) jıyntyǵyn ózara sarapqa salady.
Osydan bes jyl buryn Indonezııanyń Jakarta qalasynda ótken III Para Azııa oıyndarynda elimizdiń sportshylary tarıhı nátıjege qol jetkizip, paraazıada tarıhynda alǵash ret 33 medal (5 altyn, 15 kúmis, 13 qola) jeńip alǵan edi. Osy kórsetkishtiń nátıjesinde, Qazaqstan quramasy jalpykomandalyq esepte 13-orynǵa turaqtaǵan. Jerlesterimiz bul júldelerdi para júzý, para dzıýdo, para paýerlıftıng, para jeńil atletıka, voleıboldy otyryp oınaý jáne shahmat básekelerinen jeńip aldy.
