Máskeý aýyldyq okrýgine úsh jyldan beri quny 800 mln teńge bolatyn sý qubyry tartylyp jatyr. Merdiger kelisim-shart boıynsha jobany ótken shilde aıynda aıaqtaýy kerek edi. Alaıda qarjylyq máseleler týyndap, jumys toqtap qalǵan.
– Shyǵys Qazaqstan oblysynan kelgen merdiger kompanııa óz mindetin ýaqytynda oryndaı almaǵandyqtan, 10 qazannan bastap atalǵan aýyldyq okrýg kóleminde tehnogendik sıpattaǵy tótenshe jaǵdaı jarııalaýǵa májbúr bolyp otyrmyz. О́ıtkeni turǵyndardyń ómir súrý jaǵdaıyna nuqsan keldi. Qurylys-montaj jumystarynyń júrip jatqanyna úsh jyldan asyp ketti. Jumys ornynda 2 adam qaraıyp júrgeni bolmasa, merdiger seriktestik bıyl múlde jumys júrgizbedi desek te bolady, – dedi Qostanaı aýdanynyń ákimi Berik Tańjaryqov.
«Qazconstructions» JShS kompanııasy osy jylǵa bólingen 250 mln teńge qarjynyń 18 mln-yn ǵana ıgergen. Munyń syrtynda, jergilikti turǵyndar da ókpe-renish, shaǵymdaryn aıtyp, saǵyzdaı sozylyp ketken aýyz sý máselesin jedel sheship berýdi talap etken.
– Máskeý aýylynda 500-den asa úı tútin tútetip otyr. Ár aýlada qudyq bar. Biraq qysta bul qudyqtar ortaıyp ketedi de, keıde, tipti shelekke sý ilinbeı qalatyn jaǵdaılar bolady. Qazir bul aýyldy turaqty aýyz sýmen qamtamasyz ete almaı otyrmyz. Sondyqtan Tótenshe jaǵdaı jónindegi komıssııa osyndaı qadamǵa baryp otyr, – dedi ákim.
Qazir sý qubyryndaǵy aqaýdy anyqtaý jáne ony tehnıkalyq zertteýden ótkizý jumystary júrip jatyr. Bar másele konkýrs ótkizýge kelip tirelip tur. Ákimdik mamandary atalǵan joba 2018 jylǵy bolǵandyqtan, oǵan jedel túrde taǵy bir konkýrs jarııalaý múmkin emes deıdi.
Soǵan qaramastan toqtap qalǵan aýyz sý qubyrynyń qurylysy qaıta jandanatyn boldy. Jobany qabyldap alǵan jańa merdiger Máskeýge jeltoqsan aıynda aýyz sý jetkizýdi josparlap otyr.
Qostanaı oblysy
