«Dúnıejúzi qazaqtary qaýymdastyǵy» respýblıkalyq qoǵamdyq birlestigi, Astana medısına ýnıversıteti, akademık E.Dálenov atyndaǵy Profılaktıkalyq medısına ǵylymı-zertteý ınstıtýty birlesip ótkizgen forýmǵa dástúrli medısına salasynyń mamandary men zertteýshi ǵalymdar, joǵary sanattaǵy dárigerler, medısınalyq joǵary oqý oryndarynyń oqytýshylary men bilim alýshylary qatysty. Dástúrli medısına mamandarynyń biliktiligin jetildirý, dárilerdiń resmı tirkelýi jáne dástúrli emniń tıimdiligi men qajettiligi baıandaldy. Sondaı-aq ǵylym men tehnologııa jetistigine súıenip, zamanaýı jáne dástúrli medısına ádis-tásilderin ǵylymı negizde biriktirýdiń múmkindigi tujyrymdaldy.
– Bul forým qazaqqa kerek. Qazaq halqy qansha ómir súrse, dástúrli medısına da sonsha ómir súrip keledi. Osy kúnge deıin óz jarasyn ózi emdep, synyǵyn salyp kelgeni belgili. Qazaq medısınasyn zertteıtin ortalyq ashylýy kerek dep oılaımyn. Kórshi memleketter baıaǵyda dástúrli medısınany ǵylymmen ushtastyrǵan, – dedi Dúnıejúzi qazaqtary qaýymdastyǵy tóraǵasynyń orynbasary Qarlyǵash Hojamurat.
Dástúrli medısına – halyqtyń qanyna bitken ilim. Degenmen halyq eminiń atyn jamylyp, densaýlyqqa zııan jolmen qyrýar paıda taýyp otyrǵandar da bar. Sol sebepti osy zamandaǵy ǵylymı ádistemelerdi qoldanyp, dástúrli medısınany zertteý mańyzdy.
– Zamanaýı medısınanyń ilimderi men ádistemeleri arqyly dástúrli medısına negizin ǵylymı túrde qalyptastyrýǵa bolady. Mysaly, oqý júıesi boıynsha joǵary oqý ornyn aıaqtaǵan bilim alýshylar ekinshi qosymsha bilimdi dástúrli medısınadan alýǵa bolatynyn kóbi bilmeıdi. Bizde bilim júıesi qalyptasqan. Qazaq medısınasyn dástúrli medısınanyń ulttyq quramy retinde ǵylymı túrde negizdeıik, – degen usynys aıtty E.Dálenov atyndaǵy Profılaktıkalyq medısına ǵylymı-zertteý ınstıtýtynyń aǵa oqytýshysy Baǵaı Nazarbaıuly.
Halyq eminiń janashyrlary dástúrli medısınanyń damý baǵdarlamasyn júıeleıtin memorandým qabyldap, júıeli túrde damytý týraly bastama kóterdi.
