Sýretti túsirgen – Erlan OMAR, «EQ»
Jıynǵa IT-saladaǵy eń tabysty otandyq jáne sheteldik sarapshylar, 30 elden kelgen delegasııa, 300-den asa IT-kompanııa ókilderi, 450 spıker, 100-deı ınvestor, 150-den asa startap avtorlary qatysty. Barlyǵyn qosa alǵanda 30 myń qatysýshy jınaldy. Forýmnyń bıylǵy taqyryby – «Jasandy jáne adamı ıntellekt: durys tepe-teńdik».
Plenarlyq otyrysta Memleket basshysy Qasym-Jomart Toqaev keıingi bes jylda atalǵan forým Ortalyq Azııadaǵy IT-ındýstrııanyń sońǵy úrdisteri men damý perspektıvalaryn talqylaýǵa arnalǵan iri alańǵa aınalǵanyn atap ótti. Al Sıfrlyq damý, ınnovasııalar jáne aeroǵarysh ónerkásibi mınıstri Baǵdat Mýsın «Forým sheteldik ınvestısııalar men iri halyqaralyq kompanııalardy tarta otyryp, Qazaqstanda IT-salanyń damýyna belsendi yqpal etedi. Bul óz kezeginde eldiń IT-salasyndaǵy ekonomıkalyq kórsetkishine oń áser etedi», dedi.
Aıshyqty IT-jıynǵa venchýrlyq ınvestor, Draper ýnıversıtetiniń negizin qalaýshy Tım Draper, TikTok bas dırektory Shoý Szy Chý, Digital Nomads qaýymdastyǵynyń negizin qalaý Áset Ábdýalıev, ICPC qorynyń atqarýshy dırektory Ýılıam Paýcher, SpaceX kompanııasynyń Starlink máseleleri boıynsha vıse-prezıdenti Loren Dreıer, Arbuz, Aviata, Pinemelon USA jáne Ticketon onlaın qyzmetteriniń negizin qalaýshy Alekseı Lı, Barrat Media dırektory Djeıms Barrat qatysty. Forýmda Qazaqstannyń IT-el retinde damýynyń mańyzdy taqyryptary, kreatıvti ındýstrııa, bilim berýde GPT tehnologııasynyń qoldanýy, Smart city tujyrymdamalary, sıfrlyq ekonomıkadaǵy áıelderdiń jańa perspektıvalary, venchýrlyq naryqtardyń damýy, ǵaryshtyq baılanystaǵy progress, 5G-diń sıfrlyq transformasııaǵa áseri, No Code trendteri, sondaı-aq jasandy ıntellekt pen demokratııanyń ózara is-qımyl máseleleri, basqarý ádisteri talqylandy.
«Digital Bridge 2023-tiń eń qyzyqty ári kópten kútken bóligi IT-álemdegi eń iri startap-shaıqastardyń biri retinde Astana Hub Battle is-sharasyn aıtýǵa bolady. Oǵan Ortalyq Eýrazııadan 200-den astam IT-kompanııa qatysyp, ózderiniń IT-ónimderin odan ári damytýǵa 125 myń dollar kóleminde jalpy júlde qory úshin básekege tústi. Jeńimpazdar bes atalym boıynsha anyqtaldy. Olardyń árqaısysy 25 myń dollarǵa ıe boldy. MyMind, Porte, Beksar, MyStory jáne Qtap startaptary jarystyń úzdikteri dep tanyldy», dedi Sıfrlyq damý, ınnovasııalar jáne aeroǵarysh ónerkásibi mınıstrligi Aqparattyq tehnologııalar salasyn damytý departamentiniń dırektory Ersultan Ermanov.
Al naqty áreketterge keler bolsaq, Digital Bridge 2023 alańynda memlekettik organdar, iri kompanııalar, halyqaralyq tehnoparkter jáne basqa da uıymdar IT-ınnovasııalardy damytýǵa baǵyttalǵan 29 qujatqa qol qoıdy. Sıfrlyq damý, ınnovasııalar jáne aeroǵarysh ónerkásibi mınıstrligi 3 memorandýmdy bekitti. Onyń ishinde ICPC qorymen 2024 jyly Qazaqstanda baǵdarlamalaý boıynsha álem chempıonatyn ótkizý týraly kelisim jasaldy. «Astana Hub» halyqaralyq tehnoparki óńirde venchýrlyq ınvestısııalardy tanymal etýge Ortalyq Azııadaǵy tehnologııalyq startaptardyń ekojúıesin, elimizdiń venchýrlyq naryǵyn damytýǵa baǵyttalǵan 8 memorandýmǵa qol qoıdy.
«Digital Bridge 2023 alańynda dástúrli túrde kórmeler men túrli taqyryptyq alań uıymdastyryldy. IT-mektepter men aımaqtyq IT-habtar kórmesinde elimizdegi 16 úzdik IT-mektep jáne 14 óńirlik hab ókilderi kelýshilerge sıfrlandyrýdyń damýy, bilim berý baǵdarlamalary men óńirlerdegi startaptardyń jetistikteri týraly aıtyp berdi. Pitching Zone-de, sondaı-aq VC, startaptar men kompanııalar kórmelerinde IT-kásipkerler óz jobalaryn usynyp, jetistikteri men josparlary týraly áńgimeledi, túrli saladaǵy iri korporasııalar ókilderiniń pikirin bilip, yntymaqtasý múmkindigin talqylady. Forým alańynda ǵana emes, metaǵalamda da ótken vakansııalar jármeńkesinde 20 iri kompanııa 500-den asa bos jumys ornyn usyndy. Osylaısha, nıet bildirgenderge álemniń kez kelgen jerinen jármeńkege onlaın qatysý múmkindigi berildi», dedi «Astana Hub» halyqaralyq tehnoparkiniń ofıs dırektory Dáýlet Beımurzınov.
Eń qyzyǵy, «Meet the Drapers» startaptary týraly realıtı-shoý túsirildi. Forýmda amerıkalyq realıtı-shoýdyń 7-maýsymynyń birinshi epızody túsirilip, onda tórt otandyq startap ınvestorlar aldynda 1 mln dollar ınvestısııa alý úshin óz ónimderin usyndy. Eskerte keteıik, bıyl Meet the Drapers shoýy óziniń tarıhynda alǵash ret Ortalyq Azııada túsirilim jasady.
Mektep oqýshylary men stýdentter robottehnıka aımaǵynda aýyl sharýashylyǵy, aeroǵarysh qurylysy jáne kıberqaýipsizdik salalaryndaǵy ınjenerlik-tehnıkalyq jobalaryn usyndy. Ushqyshsyz apparat ushyrý jarysy men robottar shaıqasynda FIRST álemdik qozǵalysynyń chempıondary jáne Drone Racing baq synady. Qonaqtar 190 eldiń arasynan úzdik dep tanylǵan chempıondardyń jobalaryn tamashalady. Sondaı-aq forýmda alǵash ret «Google for Startups» sammıti ótti. Google for Startups akselerasııa baǵdarlamasyna qatysýshy kompanııanyń seriktes 15 eliniń ókilderi Qazaqstanǵa kelip, saraptamalyq is-shara ótkizdi. Bul kezdesý Silkway Accelerator aıasyndaǵy Google for Startups pen «Astana Hub» arasyndaǵy tabysty yntymaqtastyqtyń ári qaraı damýyn aıqyndaı tústi. Aıta keteıik, bul baǵdarlamadan 37 startap ótip, jalpy quny 400 mln dollar bólinetin boldy.
«Barlyq qatysýshyǵa, qonaqtarǵa, spıkerlerge, ásirese demeýshilerge qoldaýy men ekojúıeni damytýǵa qosqan eleýli úlesi úshin sheksiz alǵysymyzdy bildiremiz. Bul forým – óńirdegi tehnologııalyq kásipkerlikti damytýdaǵy, sondaı-aq otandyq startap mádenıetin nasıhattaýdaǵy jáne ekojúıege jańa qatysýshylardy tabýdaǵy negizgi mıssııamyzdyń biri. Biz forýmdy uıymdastyrýǵa atsalysqandardyń bárin Ortalyq Azııadaǵy eń iri IT-forýmynyń sátti ótýimen quttyqtaımyz jáne ınnovasııalar men startaptar áleminde jańa jetistikter kútemiz», dedi «Astana Hub» tehnoparkiniń basshysy Maǵjan Mádıev.
Elimizdiń ınklıýzıvti jáne turaqty damýynda jasandy ıntellektiniń mańyzy zor. Bul baǵytta jahandyq básekelestik baıaǵydan qarqyn alyp keledi. Biz de bul aǵysqa ilesip kele jatyrmyz. Osy forým ózekti máselelerdi talqylaýda tıimdi alańǵa aınalyp, áleýetti jobalardy iske asyrýda negizgi alań bola bildi.
