Is-sharaǵa Tótenshe jaǵdaılar mınıstriliginiń ókilderi, Asqar Zabıkýlınniń týystary, jubaıy men balalary, dos-jarandary jáne azamattyq qorǵaý organdarynyń ardagerleri, Astana qalasy TJD basshylyǵy men jeke quramy qatysty. Jıyn barysynda dostary, týystary, áriptesteri Asqardyń qyzmet barysyndaǵy azamattyǵy men jankeshtiligine erekshe toqtalyp, kópke beımálim qyrlaryn, erlikterin aıtyp, týystary búginginiń has batyryna aınalǵan baýyryn maqtanyshpen eske aldy. Sonymen qatar kósheniń saltanatty ashylýy barysynda Asqar Zabıkýlınniń jaqyndary, TJD qyzmetkerleri men ardagerleri kóshe boıyna aǵash otyrǵyzdy.
Memleket basshysynyń tapsyrmasy boıynsha Astana qalasy máslıhatynyń 2023 jyly 19 qańtardaǵy sheshimimen Astana qalasyndaǵy kóshelerdiń birine erjúrek órt sóndirýshiniń esimin máńgi este saqtaý maqsatynda Asqar Zabıkýlınniń esimi berilip, estelik taqtaısha ornatylǵan edi.
Kópshiliktiń esinde bolsa kerek, Astana qalasy Tótenshe jaǵdaılar departamenti órt sóndirý jáne avarııalyq-qutqarý jumystary qyzmeti jedel kezekshisiniń kómekshisi Asqar Zabıkýlın byltyr elordadaǵy órt sóndirý kezinde úsh adamnyń ómirin qutqaryp, alǵan aýyr jaraqattan 20 qarasha kúni aýrýhanada kóz jumǵan edi. Onyń artynda jubaıy men eki balasy qaldy.
Qyzmettik boryshqa adaldyq, mamandyqqa degen súıispenshilik, minezdiń beriktigi men jaýaptylyǵy – bul Asqar Zabıkýlınnyń boıyndaǵy qasıetter edi. Onyń erligi men beınesi halyq jadynda máńgi qalady.
