Sala merekesi qarsańynda uıymdastyrylǵan is-sharaǵa Tótenshe jaǵdaılar mınıstrinen bólek, órt sóndirý kezinde qaza tapqan qutqarýshylardyń týystary, azamattyq qorǵaý organdarynyń ardagerleri jáne jıynǵa arnaıy shaqyrylǵan qonaqtar da qatysty.
Jıynda sóz alǵan S.Sháriphanov táýelsizdik alǵan kezden bastap búginge deıin qyzmettik mindetterin atqarý kezinde azamattyq qorǵaý organdarynyń 69 qyzmetkeri qaza tapqanyn, olardyń barlyǵy óz isine adal bolǵanyn atap ótti.
«Bul órt sóndirýshiler men qutqarýshylar – basqalardyń ómirin saqtap qalý úshin óz ómirin qaterge tigýge daıyn ekeniniń taǵy bir dáleli. Olar – zamanymyzdyń naǵyz batyrlary. Olardyń qyzmeti batyldyqty, adaldyqty jáne qurbandyqty qajet etedi. О́z ómirine qaýip tóndire otyryp, únemi tótenshe jaǵdaılardyń ortasynda bolady, azamattarymyzdy qorǵaý úshin otpen jáne túrli apattarmen kúresedi. Osy saıabaqtaǵy eskertkish erlik pen janqııarlyqtyń, batyrlyq pen isine adaldyqtyń materıaldyq baılyqtan góri qundy ekenin eske salady. Qıyn sátterde adamdar birigip, múmkin emes nárseni jasaı alatynyn bildiredi», dedi Tótenshe jaǵdaılar mınıstri.
Ardagerler keńesi tóraǵasynyń birinshi orynbasary, tarıh ǵylymdarynyń doktory, professor О́mirzaq Ozǵanbaıuly jıynǵa qatysyp otyrǵan barsha qutqarýshy qyzmet salasyndaǵy áskerılerdi, jaýyngerlerdi kásibı merekelerimen quttyqtap, aldaǵy isterine sáttilik tiledi.
«Keshegi jaýynger joldastaryńyzdy eske alý is-sharasyn ótkizip jatqandaryńyz, qazaqtyń uly oıshyly, Alash qaıratkeri Halel Dosmuhameduly aıtqandaı, el úshin eńbek etken adamdardyń erligin umytpaý, eldiktiń aıqyn belgisi dep bilemin. Qanshama azamattarymyz jumys barysynda óz ómirin emes, ózge jannyń amandyǵyn oılap, qıyn sátte basyn báıgege tigip, artyna óshpes iz qaldyryp ketti. Olardyń erligin eshqashan umytýǵa bolmaıdy. Saıabaqtaǵy qolyna sábı ustaǵan batyr azamattyń eskertkishi sııaqty sizder de qanshama adamdardy qıyn sátte aman alyp qalyp júrsizder. Sondyqtan qutqarýshy qyzmeti elimiz úshin, Otanymyz úshin óte mańyzdy mamandyqtyń biri dep aıta alamyn», dedi О́.Ozǵanbaıuly.
Resmı is-sharalardan keıin S.Sháriphanov azamattyq qorǵaý organdaryna jańadan kelgen 42 qyzmetkerdiń ant qabyldaý rásimine kýá boldy.
Elordadaǵy «Qutqarýshylar saıabaǵy» órt sóndirýshiler men qutqarýshylardyń, sondaı-aq qyzmettik mindetterin oryndaý kezinde qaza tapqan qyzmetkerlerdiń qurmetine arnap osydan eki jyl buryn el Táýelsizdiginiń 30 jyldyǵyna oraı salynǵan edi. Qutqarýshylar skveriniń ortalyǵynda órt sóndirýshi túrinde jasalǵan eskertkish bar, ol ózgeniń ómirin qutqarý úshin kún saıyn óz ómirin qaýipke tigetin batyrlarǵa alǵys retinde ornatylǵan. Sonymen qatar aýmaqta 1964 jyly shyǵarylǵan AS-30 MAZ 205 rarıtetti arnaıy órt sóndirý mashınasy ornatylǵan.
