Jarystyń úshinshi raketkasy bolyp tirkelgen otandasymyz Belgııadaǵy dodany ekinshi aınalymnan bastap, tusaýkeser kezdesýinde fransııalyq Gregýar Barrerden basym tússe, shırek fınalda taǵy bir fransýz ókili Djovannı Mpetshı Perrıkardi jeńdi. Al jartylaı fınalda germanııalyq Maksımılıan Martererdi jarys jolynan yǵystyryp, týrnırdiń fınalyna joldama aldy.
Bas júlde úshin ótken básekede jerlesimiz dúnıejúzilik reıtıngte 38-orynda turǵan 19 jastaǵy fransııalyq Artıýr Fısti eki sette 6:4, 6:4 esebimen qapy qaldyryp, óz karerasynda úshinshi márte ATP sanatyndaǵy týrnırdiń jeńimpazy atandy. Al osy maýsymdaǵy ekinshi chempıondyǵyna qol jetkizdi. Ol eń alǵash byltyr Monpelede (Fransııa) ótken «ATP 250» sanatyndaǵy jarysta úzdik shyqsa, bıyl Germanııanyń Galle qalasynda uıymdastyrylǵan «ATP 500» týrnırinde top jarǵan edi.
