Byltyr jazda Medet Aqylbekuly Botaqara kentine jaqyn jerdegi ózennen eki adamdy qutqaryp qalǵan. Rostovka aýylynyń ýchaskelik polısııa ınspektory Batyrhan Seıdyǵalıev Medetke habarlasyp, kómek suraǵan. Medet ózenge jedel jetip, sýǵa súńgigen. Álgindegi áriptesi de eki kelinshekti qutqarmaqshy bolǵan eken, biraq abdyrap qalsa kerek, ol da sý ortasynda qalǵan. Tártip saqshysy áýeli áriptesine qol sozady. Odan keıin áriptesi ekeýi sýǵa batyp bara jatqan eki kelinshekti jaǵaǵa alyp shyǵady.
– Qurbym tereń jaqqa qaraı júzip ketip, sýǵa bata bastady. Men kóp oılanbaı qutqarý úshin sońynan júze berdim. Bir mezette men de bata bastadym. Bizdi qutqarmaqshy bolǵan Batyrhan esimdi polısııa qyzmetkeri de sý ıirimi qatty bolǵandyqtan, sýǵa tunshyǵa bastady. Sol sátte Medet Aqylbekuly jedel jetip keldi de, úsheýimizdi qutqardy. Erligine bas ıemiz. Sóıtsek, biz batqan jerge shomylýǵa bolmaıdy eken. Dáp sol jerde sýdyń kózi bar deıdi. Áıteýir, Medet esimdi polıseıdi Qudaı jiberip, aman qaldyq. Keıinnen Medettiń únemi osyndaı erlikke baryp júretin ınspektor ekenin bildik, – deıdi Inga Kósherbekova.
Tilegen esimdi aýyl turǵyny qas qaraıǵan shaqta jumysynan úıine bara jatyp, jaqynda ǵana alǵan jańa kóligimen aýdarylady. Kólik júrgizýshisi shoshynyp qalǵan bolý kerek, esik ashýǵa qaýqary bolmaıdy. Abyroı bolǵanda, muny jol ústinde kele jatqan Medet Asqarov baıqap qalady.
– Aýa raıy qolaısyzdyǵyna baılanysty azdaǵan boran, kóktaıǵaq edi. Rólge ıe bola almaı, kólikti aýdaryp aldyq. Kóligimiz ári-beri laqtyra bastady. Eki ret aýdarylyp tústik. Esimnen tanyp qalyppyn. Kók tútinniń ıisi shyǵa bastady. Endi birde kóligimniń ishinde qaýipsizdik beldigin bosata almaı jatqan kezde Medet kelip, áýeli qasymdaǵy jolaýshyny qutqaryp, syrtqa shyǵardy. Qudaı saqtasyn, Medet bolmaǵanda kóligimiz órtenip, sonyń ishinde qalyp qoıar ma edik. Tártip saqshysyna alǵysym sheksiz, – deıdi Botaqara kentiniń turǵyny Tilegen Sákenov.
2018 jyly Botaqara kentindegi kópqabatty úıdiń birinen órt shyǵady. Sol joly qaharman polıseı bes balany qyzyl jalynǵa oranǵan úıden syrtqa aman alyp shyǵady. «Bir áıel omyraýdaǵy balasymen dalaǵa shyǵyp qulap, kómek surady. Ol «Balalarymdy qutqar, úıde órt bolyp jatyr, qara tútin alyp ketti», dedi. Úıine júgirip kirip, eńbektep alyp izdedim. Qolyma aıaǵy ilikken balalardy syrtqa shyǵaryp otyrdym. Áıelim de qasymda edi. Ol jedel járdem shaqyrdy», deıdi tártip saqshysy.
Medet Aqylbekulynyń elge adal qyzmet etýge ant qabyldaǵanyna 16 jyldan asypty. Osy ýaqyt aralyǵynda ishki ister salasyndaǵy túrli qyzmetti atqarady. Qaı qyzmette júrse de abyroıly bolǵan azamattyń bar oılaǵany – eldiń quqyǵyn qorǵaý. Ekinshi bir mindeti – eldiń amandyǵy úshin otqa da, sýǵa da túsý.
Joǵarydaǵy erlikteri eskerilip polısııa qyzmetkeri mınıstrliktiń «Quqyq tártibin qamtamasyz etýge qosqan úlesi úshin» medalimen nagradtaldy. Memleket basshysynyń Jarlyǵymen qyzmettik boryshyn atqarý kezinde kórsetken batyldyǵy men janqııarlyǵy úshin II dárejeli «Aıbyn» ordenin keýdesine taqty. Bir aıta keterligi Medettiń barlyq baýyry quqyq qorǵaý salasynda eńbek etedi. Shańyraǵyndaǵy eki uly da ákesi sekildi eldiń alǵysyn alatyn polıseı bolýdy armandaıdy.
Qaraǵandy oblysy,
Buqar jyraý aýdany
