Foto: Aqorda
Memleket basshysy Túrkistanda ótken Quryltaıdaǵy sóılegen sózinde jańa qoǵamdyq etıka týraly aıtqanyn, alqaly jıynnan soń Quryltaıdyń keıbir músheleri usynystaryn joldaǵanyn, olar elimizde qundylyqtar júıesin qalyptastyrý qajettigine nazar aýdaryp otyrǵanyn aıtty. «Shyn máninde, muny óte mańyzdy bastama dep oılaımyn. Ony jan-jaqty talqylap, qarastyrýymyz kerek», dedi Prezıdent.
«Men buǵan deıin Adal azamat uǵymyn usyndym. Osy oraıda jastarymyzǵa arnaıy Úndeý joldaǵym keledi. Elimizde júzege asyrylyp jatqan árbir bastama, eń aldymen, Sizderge arnalady. Qazirgi reformalardyń ıgiligin kóretin de, eldik isterdi jalǵastyratyn da – sizder», dedi Memleket basshysy.
Prezıdent búgingi jastardy Qazaqstannyń kelbeti deýge bolatynyn, shyn máninde, kez kelgen memleket turǵyndaryna qarap baǵalanatynyn, ıaǵnı, bizdiń qandaı el bolarymyz óskeleń urpaqqa baılanysty ekenin atap ótti.
«Sondyqtan jastarymyz otanshyl, bilimpaz, eńbekqor, únemshil, ádil ári janashyr bolýy qajet. Jastar sportpen, dene shynyqtyrýmen aınalysýy kerek. Men muny únemi aıtyp júrmin. Osy qundylyqtardy barynsha nasıhattap, taratý qajet. Sonda jeke adamnyń qasıeti tutas ulttyń qasıetine aınalady», dedi Prezıdent.
Jastar kez kelgen ózgeriske beıim bolatynyn, ár nárseni boıyna tez sińiretinin atap ótken Prezıdent: «Men sizderdi jaqsydan úırenýge, jamannan jırenýge shaqyramyn. Uly Abaı aıtqan bes nárseden qashyq, bes nársege asyq bolyńyzdar. Sizder dáriptegen qundylyqtar qoǵamda tez ornyǵady. Sizder qoldaǵan ózgerister jyldam júzege asady. Bárimizdiń tilegimiz – bir, bul – qoǵamymyzda jappaı ádilettik ornatý. Endeshe, maqsatymyzǵa birge jeteıik», dedi.
Prezıdent jas urpaqtyń jasampazdyq qýatyna senetinin, sanaly ul-qyzdary bar Qazaqstan órkenıet kóshiniń basynda bolaryn tilge tıek etti.
«Memlekettilik tuǵyryn nyǵaıta túsý úshin zań ústemdigin ornyqtyrý óte mańyzdy. Tártipke baǵynǵan qoǵam órkenıetti bolady. Bul – zańdylyq. Ár azamat elimizdiń zańyn qurmettese, bereke-birlik te, baqýatty turmys ta bolady. Ádiletti Qazaqstandy qurý úshin quqyqtyq mádenıetti damytý qajet. Zańsyzdyq, tártipsizdik, mádenıetsizdik eldi jarǵa jyǵady. Mundaı jaǵymsyz úrdisterge búkil qoǵam bolyp qarsy turýymyz kerek. Osyny sanaǵa myqtap sińirgen jón», dedi Memleket basshysy.
