Fılıal qyzmetkerleri Aqtaý qalasynyń 18 shaǵyn aýdanynda «Baqytty otbasy» jáne «Shańyraq» memlekettik baǵdarlamasy aıasynda boı kótergen №18, 19, 20, 21 úıler janyna 50 túp zııandy jándikterge jáne shań-tozańǵa qarsy kúresý qabileti bar aılanta tuqymdy kóshetterin otyrǵyzdy. Shahardyń sáni men ekologııasyna úles qosatyn is-sharaǵa Aqtaý qalalyq ákimdigi men qajetti qural-saımandar, tyńaıtqyshtar jáne sýarý tehnıkasyn usynǵan «Kóktem» mekemesi qolushyn berdi.
– Atalǵan úıler 2022 jyly qoldanysqa berilip, ákimdikte kezekte turǵan 180 azamat baspanaly boldy. Bul alǵashqy uıymdastyryp jatqan aksııamyz emes, osyǵan deıin de memlekettik baǵdarlama aıasynda berilgen basqa turǵyn úı keshenderiniń janyna aǵash otyrǵyzǵan edik. Aǵash otyrǵyzý – kez kelgen azamattyń paryzy dep esepteımin. О́zgelerdiń aǵash otyrǵyzǵanyn kórip, qala turǵyndarynyń qyzyǵýshylyǵy oıanady dep oılaımyn. Bankimizde tek kógaldandyrý baǵytynda emes, nesıe berý baǵytynda da jumystar júıeli júrgizilýde. Tujyrymdama sheńberinde nesıeler bastapqy jarna 10% bolǵan kezde jyldyq 2% (2%-dan jyldyq tıimdi syıaqy mólsherlemesi (JTSM) jáne 5% (5,2%-dan JTSM) mólsherlemesi boıynsha beriletin bolady. Nesıeleý merzimi 20 jylǵa deıin. Jyldyq 2% mólsherleme boıynsha qaryzdarǵa I jáne II toptaǵy múgedektigi bar adamdar, múmkindigi shekteýli balalary bar nemese múgedektigi bar balalardy tárbıelep otyrǵan otbasylar, jetim balalar men ata-anasynyń qamqorlyǵynsyz qalǵan balalar, sondaı-aq kópbalaly otbasylar úmitker bola alady. Kezekte turǵandardyń barlyq basqa sanattary baǵdarlamaǵa qatysa alady jáne jyldyq 5% mólsherleme boıynsha qaryzdarǵa úmitker bola alady, – dedi «Otbasy bank» AQ Mańǵystaý oblystyq fılıalynyń dırektory M.Abýgalıev.
Fılıal basshysynyń aıtýynsha, baspana alýshylarǵa jeńil sharttarmen, ıaǵnı 10% bastapqy jarna jáne 5% -dyq jyldyq mólsherleme boıynsha nesıe (JTSM – 5,2%) rásimdelgen.
Otbasy banki arqyly 2019 jyly bastalǵan «Baqytty otbasy» baǵdarlamasy aıasynda 2019-2020 jyldary kópbalaly otbasy, múgedektigi bar bala tárbıelep otyrǵan otbasy jáne tolyq emes otbasy ólshemsharttary boıynsha 255 otbasyna, ekinshi transhta – 169, úshinshi jáne tórtinshi transhtarda sáıkesinshe 379 jáne 141 otbasyna, barlyǵy 941 otbasyna páter berilgen.
Otbasy bank bergen málimetke súıensek, Aqtaý qalasyndaǵy 19 A shaǵyn aýdanynda 2023-2029 jyldarǵa arnalǵan turǵyn úı-kommýnaldyq ınfraqurylymdy damytý tujyrymdamasy aıasynda 432 páterlik 5 úı salynǵan. Onyń ishinde 324 páter ákimdikte kezekte turǵandar arasynda bólingen. Qazirgi tańda satyp alý-satý sharttaryna qol qoıý úderisi júrip jatyr jáne ol turǵyn úıdegi qonystoıyn Táýelsizdik kúnine oraı atap ótý josparlanǵan.
Bank qyzmetkerleri ózderi arqyly berilgen turǵyn úı keshenine turǵyndar tolyqtaı qonystanǵan soń mindetti túrde senbilik uıymdastyrýdy josparlap otyr.
Mańǵystaý oblysy
