Foto: ashyq derekkóz
Qazaqstanda birqatar járdemaqy men áleýmettik tólem avtomatty túrde taǵaıyndalady. Ol úshin ótinish jazýdyń qajeti joq. Bul azamattardyń ǝleýmettik kepildikterin proaktıvti formatta qamtamasyz etetin «Otbasynyń sıfrlyq kartasy» aqparattyq júıesi arqyly júzege asady.
Eńbek jáne halyqty áleýmettik qorǵaý mınıstrliginiń málimetinshe, búgingi tańda áleýmettik-eńbek salasyndaǵy memlekettik qyzmetterdiń 50 túriniń 48-in elektrondy formatta, 29-yn proaktıvti túrde resimdeýge bolady. Olardyń ishinde Memlekettik áleýmettik saqtandyrý qorynan taǵaıyndalatyn járdemaqylar men áleýmettik tólemder de bar. Jyl basynan beri barlyǵy bir mıllıonnan astam qyzmet avtomatty túrde berildi.
Qazan aıynda birinshi, ekinshi, úshinshi toptaǵy múgedekterge arnaıy memlekettik járdemaqy taǵaıyndaldy. Buǵan deıin kópbalaly analarǵa beriletin járdemaqy, múgedektigi barlarǵa tólenetin áleýmettik tólem jáne jerleýge birjolǵy tólem taǵaıyndaý prosesi tolyǵymen avtomattandyrylǵan bolatyn.
Sonymen qatar MÁSQ-dan birden úsh járdemaqy men tórt áleýmettik tólem taǵaıyndaý isi jedeldedi.
Járdemaqylar:
balanyń dúnıege kelýine baılanysty;
bir jarym jasqa deıingi bala kútimi boıynsha;
kópbalaly otbasylarǵa beriletin tólem.
Áleýmettik tólemder:
júktilik jáne bosaný boıynsha;
bala bir jarym jasqa tolǵanǵa deıin onyń kútimi boıynsha;
eńbekke qabilettiliginen aıyrylý jaǵdaıy boıynsha;
jumysynan aıyrylý jaǵdaıy boıynsha.
Buryn bul tólemderdi taǵaıyndaýǵa segiz jumys kúni beriletin, jeti adam sheshim shyǵaratyn. Al qazir sharýany tórt adam tyndyryp otyr. Sheshim tórt jumys kúninde shyǵarylady.
Járdemaqylar men áleýmettik tólemderdi ońtaılandyrý halyqtyń áleýmettik jaǵdaıyna ǵana emes memlekettiń bıýdjetine de oń áserin tıgizdi. Osylaısha 2023 jyly 360 mln teńgeden astam qarjy únemdeldi.
