Qarjy vıse-mınıstri Dáýren Temirbekovtiń aıtýynsha, qordyń etek-jeńin jınaý aıasynda «Ulttyq qor – balalarǵa» jobasyna da durystap kóńil bólinedi. Bul oraıda Biryńǵaı jınaqtaýshy zeınetaqy qorymen (BJZQ) ıntegrasııa júzege asyrylmaq.
«Biryńǵaı jınaqtaýshy zeınetaqy qory jyl ishinde dúnıege kelgen, qaıtys bolǵan, azamattyq alǵan jáne azamattyqty joǵaltqan balalar sanyn naqtylaıdy. Derekter tolyqtaı naqtylanǵannan soń Ulttyq bank kámelet jasyna jetken balalarǵa tólem jasaý úshin qajetti somany Biryńǵaı jınaqtaýshy zeınetaqy qoryna aýdarady», deıdi vıse-mınıstr.
Onyń sózinshe, BJZQ qarajatty balalardyń maqsatqa saı paıdalanýy úshin ekinshi deńgeıli bankte nemese ulttyq poshta operatorynda ashylǵan shotyna jiberedi.
Parlament qabyldaǵan zańǵa sáıkes Ulttyq qordyń ınvestısııalyq tabysynyń 50 paıyzyn 18 jasqa deıingi barlyq jastaǵy balalar arasynda teń bólý kózdelgen. 2023 jylǵy 1 qazandaǵy resmı derekter boıynsha eldegi 18 jasqa deıingi balalardyń jalpy sany – shamamen 7 mln adam. Ulttyq qor qarajatyn bilim alýǵa jáne turǵyn úı jaǵdaıyn jaqsartýǵa baǵyttalǵan naqty eki maqsatta paıdalaný usynylady.
18 jasqa tolǵanǵa deıin balalar «qatysýshylar» bolyp esepteledi, kámeletke tolǵannan keıin «alýshylar» sanatyna kóshedi.
