Al tıisti oryndar ókilderi munyń bári «Qazgermunaı» kompanııasynyń gaz qondyrǵysyndaǵy aqaýǵa baılanysty ekenin aıtady. Negizi oblystyń bir aıdaǵy lımıti – 7,5 myń tonna. Gaz óńdeý zaýyttarynyń múmkindigine qaraı oǵan qosymsha taǵy qosylyp, ár aıda oblys 8 myń tonnaǵa jýyq suıyq gaz tutynady.
Oblys ákiminiń birinshi orynbasary Serik Qojanııazov oblysqa orta eseppen 5,5-6 myń tonnaǵa deıin gaz berip kelgen «Qazgermunaı» kompanııasynan osy qazan aıynda 4 800 tonna ǵana kelgenin aıtady.
– Gaz jetkizý jospary 529 tonnaǵa qysqarǵandyqtan biz mınıstrlikke shyǵyp, «SNPS Aqtóbemunaıgaz» kompanııasynan qosymsha 504 tonna bólinýine qol jetkizdik. Qazir osynyń 288 tonnasy tıelgen 8 vagon bizge qaraı jolǵa shyqty, – deıdi oblys ákiminiń birinshi orynbasary.
Salystyrý úshin aıta keteıik, byltyr qazan aıynda 7 590 tonna gaz bólingen eken. Bıylǵy kólem odan 1 300 tonnaǵa az bolyp tur. Osydan da oblystaǵy 25 operator gazdy talon arqyly berip, satylatyn lımıt belgileýge májbúr bolǵan. Sonda da aı sońyna jetpeı ortaıa bastaǵan qor kólemin, gazdyń oblysqa kelýinen bastap satylýyna deıingi jaǵdaıyn arnaıy qurylǵan jumysshy toby baqylaıdy.
Oblys ortalyǵynyń kireberis tustarynda beketter qoıylyp, gaz toltyrý stansalarynda kezekshilik uıymdastyrylǵan. Jyl sońyna deıin óstip amaldaýdan basqa jol kórinbeı tur.
Gaz tapshylyǵy baıqalǵaly beri «Saýts Oıl» kompanııasynan 104 tonna gaz bólinip, «Qyzylorda munaı ónimderi» men «Baıqońyr gaz» mekemelerine jetti. Alda osy kompanııamen qosymsha 140 tonna gaz bólý jóninde kelisim jasalyp otyr. Osy ýaqytqa deıin operatorlar «Qazgermunaı» kompanııasy óndirgen 4 122 tonna gazdy aldy. Qalǵan 776 tonna kestege sáıkes qazan aıynyń sońyna deıin jetkiziledi.
– Qarasha aıyna 7,5 myń tonna bólinip otyr. Onyń 4 740 tonnasyn «Qazgermunaıdan» alsaq, qalǵan 2 718 tonnasy Atyraý munaı óńdeý zaýytynan keledi. Árıne, jer moıny qashyq bolǵandyqtan Atyraý gazy bizdiń operatorlar úshin 2 ese qymbatqa túsip, kórer paıdasy az bolatyny aıdan anyq. Degenmen de jumys toby olardyń baǵany burynǵydan kótermeýin qadaǵalaıdy, – deıdi Serik Salaýatuly.
Mamandardyń aıtýynsha, «Qazgermunaı» kompanııasyndaǵy aıyna 6 myń tonnaǵa deıin suıyq gaz óndiretin ÝPG-1 qondyrǵysyndaǵy aqaý keler jyldyń birinshi toqsanynda qalypqa keltiriledi.
Qyzylorda
