Qaharman qyzdyń syrshyl sezimi

Keńes Odaǵynyń Batyry Álııa Moldaǵulovaǵa arnalǵan qoıylym qazaqtyń qaharman qyzynyń erlik isterin dáriptep qana qoımaı, akter, rejısser Igor Sedınniń arhıv aqtaryp tap­qan tyń derekterimen de tolyq­qan. Sonyń biri – sarǵaıǵan saǵy­nysh­qa toly hattar.

– Ekinshi dúnıejúzilik soǵys­ta­ asqan erlik kórsetip, nebári 19 jasynda batyr atanǵan qazaq­­tyń ójet qyzy Álııa Mol­da­­­ǵulovanyń ómir joly men erlik ańyzy meni qatty tań­ǵal­­dyrdy. Pesany oqyp, ba­tyr­ qyzdyń ómirbaıanymen ta­nys­­qannan-aq qoıylymnyń tutas qurylymy kóz aldyma kele qaldy. Álııanyń maıdan dalasyndaǵy kózsiz erligimen qatar, qarshadaı qyzdyń adam retindegi armandary men kisilik kelbetine, ishki tolqynystaryna da úńilgim keldi. Osy úshin arhıvke bas suqtym. Sol jaqtan tapqan qundy qujattar, maıdannan ata-ana, týǵandaryna joldanǵan saǵynyshqa toly sarǵaıǵan hattar spektaklimizdiń syrshyldyq sıpatyn aıshyqtaı tústi. Bul sheshimimiz kórermenderge de unaǵan sekildi. Sol úshin qýanysh­tymyn, deıdi qoıylym rejısseri Igor Sedın.

Spektaklde basty róldi teatr­dyń talantty aktrısasy Aıjuldyz Halyqova kemeline keltire keıiptep shyqty. Rejıs­serdiń sózinshe, aktrısa rejısser qoıǵan talaptyń barlyǵyn joǵary deńgeıde oryndaǵan. Buǵan deıin de «Kishkentaı hanzada» qoıylymynda birlese jumys istegen talantty tandem «Álııa» qoıylymyn da áserli etip jetkize bildi. Al spektakldiń sahnalyq sheshimi, ıaǵnı ssenografııasymen jumys istegen Qanat Maqsutov rejısser oıyn birden uǵyp, oqıǵa áserin beretin naǵyz atmosferaǵa baı keńistik týdyra bildi. Taǵylymǵa toly qoıylymdy kórermen de zor qýanyshpen qabyl aldy. Shymyldyq jabylǵannan keıingi úzilmeı uzaq soǵylǵan tolassyz shapalaq úni sony aıqyn ańǵartqandaı.

Qalpyna keltirilgen kóne teatr­dyń taǵy bir jarqyn jańa­lyǵy – jańa maýsymmen qatar kór­kem ǵımaratta ashylǵan «Jańa teatr» halyqaralyq teatr­ forýmy da teatr salasynyń qyzmetkerleri úshin jemisin berdi. Eki kúnge sozylǵan sharada bilikti mamandar elimizdiń túkpir-túkpirinen jınalǵan teatr akterleri men rejısserlerge, jalpy forýmǵa qatysýshylar úshin sahnalyq sóıleý (pedagog Dmıtrıı Koshmın, Sankt-Peterbýrg qalasy), semserlesý (pedagog Qazaqstannyń eńbek sińirgen qaıratkeri Sergeı Matveev, Astana qalasy), rejıssýra jáne akterlik óner (pedagog Racha Mahataev, Astana qalasy) boıynsha sheberlik saǵattaryn ótkizdi. Sonymen qatar forým jumysyna teatr synshylary, atap aıtqanda ónertaný kandıdaty Sánııa Qabdıeva (Almaty qalasy) men Anton Alekseev (Sankt-Peterbýrg qalasy) qatysyp, «Qazaqstan teatrlaryndaǵy zamanaýı úrdister» taqyrybynda dáris oqydy. Teatr synshylarynyń M.Gorkıı atyndaǵy memlekettik akademııalyq orys drama teatry ujymynyń jańa qoıylymda­ryna jasaǵan kásibı taldaýy da teatr­­dyń turaqty kórermenderi úshin áserge toly erekshe óner oqıǵasy bolǵany anyq.

Birneshe jylǵa sozylǵan kúrdeli jón­deý­ jumystaryna baılanysty toqtap qal­ǵan shy­ǵar­­mashylyq jumys qaıta jan­­danyp, teatr sahnasynda «Álııa» spek­taklimen qatar jáne birneshe jańa qoıy­lym­nyń premeralyq kórsetilimi ótti. Olar­dyń qatarynda R.Maha­tevtyń rejıs­serligimen qoıylǵan A.Chehovtyń «Shıe baǵy» komedııa­sy, A.Troıanovtyń rejıs­serlik qoltańbasy sán bergen T.Let­tstiń «Jazdyń sońy» jáne rejısser S.Fedotovtyń sýretkerlik sarap­taýyn­da usynylǵan E.Ros­tannyń áıgili «Sırano de Ber­je­rak» qoıylymdary bar.

Aıtýly spektaklder­ kúr­deli jóndeý­den ótken teatr ǵımaratynda 123-maý­symynyń ashylýyna arnaıy daıyndaldy. Teatr jańalyǵy áste munymen toqtamaq emes, shyǵarmashylyq ujym aldaǵy ýaqytta da kóńilge rýhanı lázzat syılar qyzyqty qoıylymdary­men eresekter men kishkentaı kórermenderin ár kez qýantýǵa asyq.