Kelissóz aldynda Qasym-Jomart Toqaev pen Emmanıýel Makron bir-birine resmı delegasııa múshelerin tanystyrdy. Qurmet qaraýylynyń bastyǵy memleket basshylaryna raport berip, eki eldiń ánurandary shyrqaldy. Sodan keıin prezıdentter shaǵyn quramda kelissóz júrgizý úshin Shyǵys zalyna bardy.
Qasym-Jomart Toqaev Emmanıýel Makronǵa iltıpat bildirip, jyly qarsy aldy.
«Prezıdent myrza, biz úshin búgin úlken oqıǵa. Sizdiń saparyńyzdy bárimiz quptaımyz. Meniń shaqyrýymdy qabyl alyp, Qazaqstanǵa resmı saparmen kelgenińiz úshin alǵys aıtamyn. Qazaqstan men Fransııa arasyndaǵy yntymaqtastyq jaqsy damyp kele jatyr. Degenmen ekijaqty qarym-qatynasqa tyń serpin berý kerek. Sondyqtan sizdiń saparyńyzdy tarıhı, óte mańyzdy dep aıtýǵa bolady. Búgingi kelissózder nátıjeli bolatynyna senimdimin. Oǵan eshqandaı kúmánim joq», dedi Prezıdent.
Memleket basshysy Fransııa Qazaqstannyń Eýropa Odaǵyndaǵy basty jáne senimdi seriktesi, sondaı-aq el ekonomıkasynyń iri ınvestorynyń biri ekenin atap ótti.
О́z kezeginde Emmanıýel Makron Qazaqstan men Fransııa arasyndaǵy baılanystarǵa joǵary baǵa berdi.
«Prezıdent myrza, resmı saparmen kelýge shaqyrǵanyńyz úshin alǵys aıtamyn. Astanaǵa kelip, Sizben júzdesip otyrǵanyma qýanyshtymyn. Osy sapardy uıymdastyrǵanyńyzǵa rızashylyǵymdy bildiremin. Bul sapar bizdiń ekijaqty seriktestigimiz úshin mańyzdy jylmen tuspa-tus kelip otyr. Búgin biz ózekti halyqaralyq máseleler boıynsha pikir almasyp, BUU Jarǵysyn, sonyń ishinde aýmaqtyq tutastyq, ulttyq táýelsizdik qaǵıdattaryn saqtaýǵa beıildi ekenimizdi taǵy da naqtylaı alamyz. Sonymen qatar ekijaqty yntymaqtastyq máselelerin talqylaımyz. Biz ekonomıkalyq turǵydan seriktes eldermiz. Sondaı-aq Qazaqstan men Fransııa arasyndaǵy ekonomıkalyq-strategııalyq áriptestigimizdi odan ári damyta túsetin mańyzdy kelisimderge qol qoıamyz. Sizben júzdesip, ortaq kún tártibin talqylaý múmkindigi týǵany úshin qýanyshtymyn», dedi Fransııa Prezıdenti.
Memleket basshylary qazaq-fransýz strategııalyq seriktestiginiń qazirgi jaı-kúıi men damý perspektıvalaryn talqylady. Saıası dıalogty nyǵaıtýǵa, saýda-ekonomıkalyq, ınvestısııalyq, energetıkalyq, kólik-logıstıkalyq jáne mádenı-gýmanıtarlyq salalardaǵy yntymaqtastyqty keńeıtýge erekshe nazar aýdaryldy.
Budan bólek, Qasym-Jomart Toqaev pen Emmanıýel Makron halyqaralyq jáne óńirlik kún tártibindegi ózekti máseleler jóninde pikir almasty.
Ekijaqty kezdesýden keıin memleketter basshylary kelissózderdi eki el delegasııalarynyń qatysýymen keńeıtilgen quramda jalǵastyrdy.
