Dástúrli is-sharany «Qostanaı daryny» óńirlik ǵylymı oqý-ádistemelik ortalyǵy men Y.Altynsarın atyndaǵy mamandandyrylǵan mektep-gımnazııa-ınternatynyń ustazdary birlesip uıymdastyrǵanyn aıta ketken jón.
Bekitilgen erejege sáıkes, 6-7 synyp oqýshylary Ybyraı óleńderin mánerlep oqý sheberliginen synǵa tússe, olardan bir-eki jas eresekteý 8-9 synyp oqýshylary uly aǵartýshynyń ǵıbratty áńgimelerin jatqa aıtýdan jarysty. Is-shara barysynda aýdandyq kezeńnen iriktelip shyqqan kileń úzdikterdiń Qostanaı tórindegi kórkemsóz saıysyna úlken úmitpen, yjdaǵatty daıyndyqpen kelgeni baıqalyp turdy. Ybyraı shyǵarmalaryn mánerlep, nátine keltire oqyp, tyńdaýshysyn shyn uıyta bilgen oqýshylarmen qatar, uly ustazdyń qysqa áńgimelerin sahnalyq kórinis arqyly ashyp jetkize bilgen úmitkerler de kóp.
Qazylar alqasynyń uıǵarýymen, baıqaýdyń bas júldesin Ybyraı óleńderin túgelge derlik jattap alyp, mánerine keltirip oqyp bergen Arqalyqtaǵy Keıki batyr mektebiniń 7-synyp oqýshysy Meıirlan Qapez utyp aldy. Birinshi orynǵa Jangeldın aýdanyndaǵy Altynsarın mektebiniń 6-synyp oqýshysy Jaına Alpysqyzy laıyq dep tanyldy.
Ybyraı áńgimelerin mánerlep oqý boıynsha kópten erek kórkem óner kórsetken Arqalyqtaǵy Y.Altynsarın atyndaǵy gımnazııanyń 8-synyp shákirti Janaıym Syrǵabaıqyzy bas júldeni utyp aldy.
Jalpy, baıqaýǵa qatysqan oqýshylar men ustazdardyń eshqaısysy da qur qol qaıtqan joq. Jeńimpazdar men júldegerler arnaıy dıplomdar men eskertkish syılyqtarǵa ıe bolsa, qalǵan oqýshylarǵa uly aǵartýshynyń shyǵarmalaryn nasıhattaýshy úlgili shákirt degen mazmundaǵy alǵyshattar tapsyryldy.
Qostanaı oblysy
