Shákárimtanýdyń túbi ar ilimi ǵana emes, qazaqtaný, musylmantaný bolyp kete beretini belgili. Semeıdegi Shákárim ýnıversıteti aqyn muralarynyń damýyna aıtarlyqtaı úles qosyp kele jatqany jáne bar. Dóńgelek ústelge arnaıy shaqyrylǵan ýnıversıtet janyndaǵy «Shákárim» mýzeıiniń basshysy Turdyqul Shańbaı «Shákárim fenomeni» taqyrybynda sóz sóılegende osyǵan toqtaldy. Otandyq ǵylymnyń oljasyna aınalmaq «Shákárimtaný máseleleri» atty irgeli serııalyq ǵylymı jınaqty da atalǵan ýnıversıtet shyǵarý ústinde.
Semeıdegi Shákárim ýnıversıtetiniń túlegi Aıjan Aman-jol daıyndaǵan «Shakarım. Izbrannoe» jınaǵymen qatar, «Shákárim» tulǵalyq ensıklopedııasy men Muhtar Maǵaýınniń daıyndaýymen 1978 jyly Lenıngradta jaryq kórgen «Poety Kazahstana» jınaǵyn elshilikke syıǵa tartty.
Mádenı-ǵylymı is-shara barysynda Turdyqul Shańbaı Shákárim shyǵarmalaryn orys tilinde Máskeýden shyǵarý týraly bastama kóterdi. Qazaqstannyń Reseıdegi Tótenshe jáne ókiletti elshisi Dáýren Abaev qoldaıtynyn jetkizdi. «Hýdojestvennaıa lıteratýra» baspasynyń bas redaktory G.Prıahınmen birlese aqyn shyǵarmalaryn shyǵarý jóninde kelisim jasaldy.
Qazaq mádenıeti men ónerin nasıhattaýda Reseıdegi Qazaqstan elshiligi birqatar jobany iske asyryp jatyr. Osy dóńgelek ústel ústinde «Trısta kazahskıh skazok» atty eki tomdyqtyń tusaýkeser rásimi ótti. Atalǵan is-sharaǵa jazýshy, halyqaralyq jýrnalıst V.Snegırov, ádebıettanýshy ǵalym V.Ogryzko, jazýshy G.Prıahın syndy bir top reseılik zııaly qaýym ókilderi qatysty.
