Ádettegideı tańerteń elimizdiń ánurany oryndaldy. Aýdan turǵyndary óz ákimderin ózderi tuńǵysh ret saılap tur. Sondyqtan da barlyǵy derlik jaýapkershilik tanytýǵa tyrysty.
– Bizdiń aýdan osy saılaýǵa qatysatyn 45 pılottyq óńirdiń qatarynda ekenin bilgen boıda daıyndyqty bastadyq. Bul óte mańyzdy joba. Ol qoǵamdy demokratııalandyrý jolyndaǵy progressıvti ózgeristerdi jáne «estıtin memleket» tujyrymdamasyn júzege asyrýdy kórsetedi. Búginde 44 saılaý ýchaskemizdiń barlyǵy der kezinde ashyldy, jumys josparǵa saı júrip jatyr. Bizdiń azamattar bul kúndi asyǵa kútti, daýys berýge belsendi qatysyp jatyr, – dedi Glýbokoe aýdanynyń aýmaqtyq saılaý komıssııasynyń tóraıymy Ksanna Sarycheva.
Glýbokoe aýdanynda barlyǵy 39,5 myńnan astam saılaýshy tirkelgen. Eske sala keteıik, Memleket basshysy bıylǵy qyrkúıektegi Qazaqstan halqyna Joldaýynda aýdan, oblystyq mańyzy bar qala ákimderin tikeleı saılaý engiziletinin málimdegen bolatyn.
Kóptegen shet memleketterdiń tájirıbesinen belgili bolǵandaı, tikeleı saılaý kezinde jergilikti atqarýshy organnyń basshysy óz saılaýshylary aldynda úlken jaýapkershilikti sezinedi, bul onyń jumysyna da oń áserin tıgizgen.
Altaı qalasyndaǵy mektep-lıseı bazasynda ornalasqan №636 saılaý ýchaskesinde de tańnan beri saılaý naýqany qyzý júrip jatyr.
– Jańa ákimniń jastarǵa kóbirek kóńil bólgenin qalaımyn. Qalamyz ben aýdanymyzdy órkendetse eken deımiz, – deıdi aǵylshyn tili pániniń muǵalimi Ánel Saparǵalıeva.
Sonymen qatar №636 saılaý ýchaskesinde alǵashqylardyń biri bolyp jergilikti ken baıytý zaýytynyń jumysshylary Islam Marsenıýk pen Aleksandr Troshkov óz tańdaýyn jasady. Olar mundaı formatta alǵash ret ótkizilip otyrǵan saılaý úlken úmit beretinine senim bildirdi.
Shyǵys Qazaqstan oblysy
