Foto: aikyn.kz
«Elimizde AES salýǵa qatysty túrli pikir aıtylyp júr. Bir jaǵynan, Qazaqstannyń atom energetıkasyn damytý áleýeti mol. Elimiz tabıǵı ýran óndirý kólemi jóninen álemde birinshi oryn alady. Sondaı-aq ıadrolyq otyn komponentterin óz elimizde óndiremiz jáne ýrandy ızotopty baıytý jónindegi qyzmetterge qol jetkize alamyz. Úlbi metallýrgııa zaýytynyń bazasynda Qytaıdyń atom elektr stansııalary úshin daıyn ıadrolyq otyn shyǵarylady.
Ekinshi jaǵynan, kóptegen azamattar men sarapshylar atom stansııasynyń qaýipsizdigine kúmán keltiredi. Semeı ıadrolyq synaq polıgonynyń aýyr qasiretin eskersek, muny túsinýge bolady. Qazaqstan aýmaǵynda AES salý máselesinde Reseı tarapynyń járdem berý usynysyn joǵary baǵalaımyz. Áıtse de AES qurylysy jónindegi túpkilikti sheshim referendým qorytyndysy boıynsha qabyldanady.
Men 2019 jylǵy saılaýaldy baǵdarlamamda asa mańyzdy strategııalyq problemalarǵa qatysty sheshim referendým arqyly qabyldanady dep málimdegen edim», dedi Q.Toqaev. Prezıdent eki eldiń ınvestısııalyq yntymaqtastyǵyna qatysty myna jaıtty basa aıtty. 2005 jyldan beri qaraı Reseı Qazaqstanǵa 20 mıllıard dollardan asa ınvestısııa quıǵan. Al Qazaqstannyń kórshimizge salǵan ınvestısııa kólemi – 6 mıllıard dollarǵa jeteqabyl.
«Investısııalyq yqpaldastyqtyń osylaısha oń qarqyn alýyna óndiristik kooperasııanyń da septigi tıdi. Onyń aıasynda eki eldiń bıznes sýbektileri jalpy somasy 33,5 mıllıard dollar bolatyn 143 birlesken jobany júzege asyryp jatyr. Jalpy somasy 3,2 mıllıard dollar bolatyn 30 mańyzdy joba sátti iske qosyldy. Qazirgi kezde mashına jasaý, metallýrgııa jáne hımııa ónerkásibi sekildi ekonomıkanyń mańyzdy salalarynda 40 joba júzege asyrylýda. Olardyń jalpy quny 16,6 mıllıard dollardy quraıdy ári 15 myńnan astam adamdy jumyspen qamtıdy», degen Prezıdent bul baǵytty damytýdyń áleýeti zor ekenin jetkizdi.
