«Eki eldiń damý joldaryn óz betinshe ári derbes tańdaýy qos tarapqa kedergi keltirmeıdi, kerisinshe, bul teń quqyly jáne ózara tıimdi áriptestiktiń paıdaly jaǵyn eseleı túsedi. Muny Qazaqstanda da, Reseıde de jaqsy túsinedi», dedi Prezıdent.
Qasym-Jomart Toqaev birlesken kúsh-jigerdiń arqasynda Qazaqstan men Reseı arasyndaǵy shekara eki el ekonomıkalarynyń ıgiligi úshin belsendi jumys istep jatqanyna nazar aýdardy. Munyń naqty paıdasyn shekara mańyndaǵy óńirlerde turatyn 25 mıllıonǵa jýyq adam sezinip otyr.
«Ǵasyrlar boıy bir-birimen qońsylas ómir súrgen ata-babalarymyz dostyq, senim men tatý kórshilik qarym-qatynastyń myzǵymas qundylyqtaryn bizge amanat etti. Biz bul qundylyqtardy saqtap, kelesi urpaqqa jetkizýimiz kerek», dedi Prezıdent.
Kelissóz barysynda taraptar ekijaqty ekonomıkalyq kún tártibiniń negizgi aspektilerin jan-jaqty talqylady. Sondaı-aq aldaǵy yntymaqtastyqtyń negizgi baǵyttaryn aıqyndap, densaýlyq saqtaý, energetıka, kólik, aýyl sharýashylyǵy, sport jáne taǵy da basqa salalardaǵy yqpaldastyqty nyǵaıtýdy kózdeıtin birqatar ýaǵdalastyqqa qol jetkizdi.
Vladımır Pýtın dástúrli qonaqjaılyǵy úshin Qasym-Jomart Toqaevqa alǵys aıtyp, shaǵyn quramdaǵy kelissózdiń nátıjeli bolǵanyn atap ótti
«Reseı men Qazaqstan – jaı ǵana emes, eń jaqyn odaqtastar. Mundaı qarym-qatynas uzaq jyldar boıy qalyptasty. Halyqtarymyzdyń ıgiligine qaltqysyz qyzmet etetin baılanystarymyzdy nyǵaıtý dástúrin jalǵastyryp otyrǵany úshin Qasym-Jomart Kemelulyna alǵys aıtqym keledi», dedi Reseı Prezıdenti.
Vladımır Pýtın aýyl sharýashylyǵymen qatar, bilim jáne ǵylym, joǵary tehnologııa, mashına jasaý, hımııa ónerkásibi, ónerkásiptik óndiris sııaqty salalar yntymaqtastyǵymyzdyń basym baǵyttaryna aınalýǵa tıis dep sanaıdy. Kezdesý sońynda prezıdentter Qazaqstan men Reseı arasyndaǵy kópjaqty qatynastardy nyǵaıtýǵa jáne Eýrazııa keńistigindegi ıntegrasııalyq úderisterdi ilgeriletýge qos tarap ta beıildi ekenin rastady.
