Dárishananyń saltanatty ashylý rásimine jýrnalıstıka fakýltetiniń oqytýshylary, qalamgerdiń týystary, zamandas dostary men áriptesteri, shákirtteri qatysty.
Baıtursyn aǵa ómiriniń sońǵy jyldaryn ustazdyqpen ushtastyryp, atalǵan bilim ordasynda kóptegen daryndy shákirtti tárbıelep shyǵardy. Ýnıversıtettiń sol kezdegi rektory Zulqarnaı Aldamjarovtyń qoldaýymen 1996 jyly tuńǵysh ret Ahmet Baıtursynulynyń týǵan jeri Aqkólge «Aq jol» ǵylymı-tanymdyq ekspedısııasyn uıymdastyryp, kónekóz qarııalardan ult ustazyna qatysty birsypyra aýyzeki derekterdi jazyp alyp, tarıhqa taspalap qaldyryp ketti. Ol jazyp qaldyrǵan qundy derektiń biri – Aqańnyń eń sońǵy ret atamekenine kelip, ákesi men aǵasyna tam turǵyzyp ketýi.
Kezinde biraz jyl boıy jýrnalıstıka fakýlteti shákirtteriniń qalam ushtar quralyna, stýdent jastardyń súıikti basylymyna aınalǵan «Jas órken – Qostanaı» jýrnalynyń alǵashqy shyǵarýshysy da Baıtursyn Ilııas aǵamyz edi. Jýrnaldyń eń alǵashqy sany qolyna tıgen sáttegi baqytty redaktordyń qýanyshty sátiniń kýási, qudaıy kórshisi ári talaı jyl syrlas dosy bolǵan aqyn Nıkolaı Kochın:
«Ol kúndelikti ómirde óte qarapaıym bolatyn. Tipti bir qaraǵan kisige qolynan eshteńe kelmeıtin, tym jýas, momyn adam bolyp kórinetin. Shyntýaıtynda, ol óz maqsatyna jetý úshin kez kelgen kedergini buzyp-jaryp ótetin muzjarǵyshtyń naǵyz ózi edi. Buǵan ábden kózi jetken adammyn. Birde biz turǵan úıdiń aýlasynda kezdeısoq kezdesip qaldyq. Qolyna bir jýrnal ustap alǵan. Janarynda erekshe ot oınap, júzi bal-bul janyp tur. «Búginnen bastap men myna jýrnaldyń redaktorymyn!», dedi balasha shattanyp. Onyń bulaısha qýanǵanyn buryn-sońdy kórmegen edim», dep tebirene eske alady.
Qalamgerdiń «Tyń túlekteri», «Toǵyz perne», «Altyn besik» atty kitaptary jaryq kórgen. Birneshe toptamalyq jınaqtarǵa óleńderi men ocherkteri engen.
Saltanatty is-shara barysynda jýrnalıstıka fakýltetiniń ozat stýdenti Dıana Ysqaqovaǵa jazýshy-jýrnalıstiń shákirtteri taǵaıyndaǵan jylyna bir ret berilip turatyn Baıtursyn Ilııas atyndaǵy shákirtaqy tabystaldy. Al qalamgerdiń týystary dárishanaǵa ınteraktıvti taqta tartý etti.
Qostanaı oblysy
