Ortopedııa salasynyń tanymal mamany Mırambek Jumaǵulovtyń jetekshiligimen, Máskeýdegi Prıorov atyndaǵy Ǵylymı-medısınalyq zertteý ortalyǵy mamany Alekseı Shýmskııdiń qatysýymen alǵash ret elimizde jalpy tize men jambas býyndaryn endoprotezdeý, sondaı-aq tize býynyn bir aıdarshyqty protezdeıtin alǵashqy operasııalar jasaldy. Robottyń kómegine júgingen kezde árbir naýqasqa jeke emdeý tásili saqtalyp, robot operasııaǵa deıin jasandy býynnyń dál 3D-jospary men ımplanttyń durys ólshemin jasap, ony ornatatyn oryndy týra tańdaıdy.
«3-7 qarasha aralyǵynda biz endoprotezdeýge muqtaj 9 naýqasty tańdap, elimizde robottyń kómegimen tize jáne jambas býyndaryn aýystyrýdyń alǵashqy operasııalaryn jasadyq. Úmitkerlerdi irikteý birneshe aı boıy yjdaǵattylyqpen júrgizildi. Dárigerler konsılıýmy ótip, jasandy býyndy dál 3D-josparlaý úshin KT zertteýdiń sıfrlyq nátıjeleri AQSh mamandaryna jiberildi. Robottyń arqasynda operasııa aldyn ala josparlanǵandaı – 1 mm-den de kem qatelikpen júzege asyrylady. Sondaı-aq jumsaq tinderdiń saqtalýy barynsha qamtamasyz etilip, baılam apparatynyń ońtaıly tepe-teńdigine qol jetkiziledi», deıdi Almaty №4 QKA hırýrgııa bólimshesiniń meńgerýshisi M.Jumaǵulov.
Osy arada «Stryker» kompanııasy usynǵan Mako tehnologııasy dálirek ári boljamdy hırýrgııalyq nátıje berip, naýqastyń densaýlyǵyn tez qalpyna keltirip, protezdiń de merzimin uzarta alatynyna toqtala ketken jón. Mako tehnologııasymen bir aıdarshyqty endoprotez jasatqan naýqastar onyń zaqymy az ekenin, qalpyna oralý múmkindigi tez jáne jasandy protezdi óz býynyndaı sezingenderin aıtady.
«Búginde mundaı tehnologııa damyǵan elderde tanymal, muny AQSh, Kanada, Japonııa, Koreıanyń jetekshi klınıkalary qoldanyp keledi. Almaty qalasy ákimdiginiń qoldaýymen biz Qazaqstanda robottyń kómegimen alǵashqy tize jáne jambas býyndaryn aýystyrý operasııalaryn jasadyq. Bul – ınnovasııalyq ortopedııa úshin ári travmatologııalyq-ortopedııalyq kómekti jetildirýdiń jańa kezeńi. Jyl saıyn mundaı operasııany qajet etetin naýqastar sany artyp keledi. Máselen, osy jyldyń 10 aıynda bizdiń aýrýhanada 1,5 myńnan asa býyn aýystyrý operasııasy jasalsa, endigi maqsatymyz – qyzmetimizdi jetildirip, sapaly medısınalyq kómek kórsetý», deıdi Almatydaǵy №4 QKA dırektory, medısına ǵylymdarynyń kandıdaty, MBA, DBA professory Birjan Dosmaılov.
Aıtqandaı, 2012 jyly osy aýrýhanada jambas, tize, ıyq, shyntaq býyndaryn, sonymen qatar aıaq-qoldyń iri býyndaryndaǵy endoprotezdi tolyq jáne jartylaı aýystyrýdy júzege asyratyn mamandandyrylǵan endoprotezdeý bólimshesi ashylǵanyn aıta ketý kerek. Aýrýhanadaǵy endoprotezdeý tájirıbesi 1975 jyly Anatolıı Chýchýlo №4 QKA-da jambas býynyn bir polıýsti endoprotezdeý operasııasyn jasaǵan kezden bastaý alady. Osy jyldar ishinde 20 myńnan asa pasıentke býyn aýystyrý operasııalary jasalǵan.
ALMATY
