Kerekýlik aqyn Elaman Qabdyláshimniń «О́mirqos» atty jyr jınaǵy 2018 jyly «Qasym.kz» serııasymen jaryq kórgen. Kitapta jas talanttyń tyrnaqaldy týyndylary toptastyrylyp, «Esenınnen tórt óleń» degen ataýmen orystyń áıgili aqynynyń óleńderi aýdarylyp berilgen edi. Onda «Zametalsıa pojar golýboı…», «Kraı lıýbımyı! Serdsý snıatsıa…» jáne taǵy basqa jyrlary bar.
S.Toraıǵyrov atyndaǵy oblystyq kitaphananyń kreatıvti shyǵarmashylyq ortalyǵynyń jetekshisi Maral Tájenovanyń aıtýynsha, jergilikti Chehov teatrynyń akterleri áıgili aqynnyń qazaq tilindegi týyndylaryn arnaıy surastyryp kelgen. Sebebi jergilikti kitap dúkenderinen eshteńe tappapty. Al kitaphana qorynda Elamannyń «О́mirqos» kitaby biraz jyldan beri saqtalyp tur. Osylaısha, kitap Máskeýdegi Esenın mádenı ortalyǵyna jol tartqan. Ony jýyqta Pavlodarda «Lıýbov ı golýbı» spektaklin qoıǵan máskeýlik rejısser Igor Merkýlov aparyp tapsyrǵan.
Esenın ortalyǵynyń dırektory, Reseıdiń halyq ártisi Sergeı Nıkonenko pavlodarlyqtarǵa alǵysyn bildirip, arnaıy beınejazba jarııalady. «Esenın poemasynyń qazaq tilindegi tamasha aýdarmasyn usynǵandaryńyz úshin zor alǵysymdy bildiremin. Ortalyqta aqyn óleńderiniń eýropalyq, ózbek, vetnam tilderinde aýdarmalary saqtaýly. Al qazaq tilindegisi joq edi. Bul olqylyqtyń da orny toldy», dedi ortalyq basshysy. Aıtyp óteıik, S.Nıkonenko – Esenınniń rólin kınoda alǵash oınaǵan akter.
PAVLODAR
