Bıyl alǵash ret sýbsıdııalaýdyń jalpy erejelerine fermerlik jylyjaılarǵa sýbsıdııa alýǵa múmkindik beretin norma engizildi. Endi jylyjaılar ornalasqan oblys ákimdikteri tıisti ókimderdi qabyldap, sýbsıdııa mólsherin belgileýge tıis. Aýyl sharýashylyǵy mınıstrliginiń málimetinshe, qazirgi tańda eki óńir ǵana bul jumysty júrgizip jatyr. Olar – Shymkent pen Túrkistan oblysy. Onyń ishinde Túrkistan óńiri ónerkásiptik jylyjaılar úshin – 8,1 mln teńge/ga, fermerlik jylyjaılar úshin – 4,8 mln teńge/ga. Shymkent bıyl 20 qarashaǵa deıin normatıvter boıynsha buıryq shyǵarýdy josparlap otyr.
«Jylyjaı sharýashylyǵyn damytý úshin memleket kelesi qoldaý sharalaryn kórsetýde: ınvestısııalyq sýbsıdııalar aıasynda jylyjaı keshenderin salý jáne keńeıtý jobalaryn iske asyrý kezinde shyǵyndardyń 25%-yn, tamshylatyp sýarý júıesin qurý jáne keńeıtý kezinde 50%-yn óteý kózdelgen», dep habarlady Aýyl sharýashylyǵy vıse-mınıstri Azat Sultanov.
Ulttyq akkredıtteý ortalyǵynyń málimeti boıynsha fermerlik jylyjaı sharýashylyqtarynyń taǵy 142 ótinimi – ınspeksııa organdarynyń qaraýynda.
Keńes qorytyndysy boıynsha Serik Jumanǵarın ákimdikter men baqylaýshy memlekettik organdarǵa kókónisterdi jabyq topyraqqa otyrǵyzý aldynda jylyjaılarǵa ýaqtyly kómir jetkizýdi baqylaýǵa alýdy tapsyrdy.
«Jylyjaılar men kókónis qoımalary – aýyl sharýashylyǵy ınfraqurylymynyń mańyzdy elementteriniń biri. Biz birinshi kezekte azyq-túlik qaýipsizdigi aıasynda elimizge qajetti daqyldardy ósiretin sharýashylyqtarǵa memlekettik qoldaý sharalaryn kórsetýimiz kerek. Mysaly, ol daqyldardyń qatarynda qyzanaq pen qııar bar. Barlyq óńirge qolda bar jylyjaılardyń esebin júrgizip, biz úshin basym daqyldardy ósiretinderge qoldaý kórsetýdi qamtamasyz etý qajet», dep atap ótti vıse-premer.
Jylyjaı alańdarynyń negizgi bóligi ornalasqan: Túrkistan oblysynda – 824,2 ga, Almaty oblysynda – 79 ga, Jambyl oblysynda – 23,2 ga, Mańǵystaý oblysynda – 15,5 ga, Qaraǵandy oblysynda – 43 ga, Aqtóbe oblysynda – 38 ga, Atyraý oblysynda – 15,6 ga, Shymkent qalasynda – 139,2 ga jáne Almaty qalasynda – 11,1 ga.
