Bul kitapqa qalamy júrdek qalamgerdiń keıingi jyldary jazǵan ádebıet týraly oılary men tanymal qalamgerlerden alǵan suhbattary, kóńildi selt etkizer oıly jazbalary toptastyrylǵan. Ásirese Ábdijámıl Nurpeıisov, Ánes Saraı, Sapar Baıjanov, Seıdahmet Berdiqulov, Ádilbek Abaıdildanov, Ǵabıden Qulahmet, Erjuman Smaıyl, Erbol Shaımerdenuly, Nesipbek Dáýtaev, Seıitqul Ospanov, Qazı Danabaev týraly jazǵan estelikterinde olardyń adamı bolmysy men shyǵarmashylyǵyn artyq-kem boıaý qospaı, dál sýretteıdi. Sondaı-aq Mereke Qulkenov, Álibek Asqarov, Qaısar Álim, Súleımen Mámet, Baýyrjan Omaruly sekildi qalamy qarymdy zamandastarynyń shyǵarmashylyǵy jaıynda jazǵan esseleri men maqalalaryn oqyǵanda qant qıyǵyndaı erip ketesiz. Al kitapqa ataýy berilgen «Qarapaıym Hám tamasha taǵdyrlar» atty zertteý maqalasynda orystyń kórnekti jazýshysy Valentın Raspýtınniń týyndylaryn jiliktep taldap, parasatty oı tolǵaıdy. Avtordyń aıtýly tulǵalardan alǵan suhbattary da maıdan qyl sýyrǵandaı shynshyldyqpen jazylǵan.
Bir sózben aıtqanda, jazýshynyń oqyrmanǵa jol tartqan jınaǵy – álem ádebıetinde ómirge kelgen tyń bastamalardy qozǵaýymen, adam psıhologııasyndaǵy alýan túrli tartystardy jetkizýdegi ádis-tásilderimen, zamandas qalamgerleri týraly tolǵanystarymen, eń aqyry, qoǵamdaǵy qubylystarǵa jeke kózqarasymen eshkimdi beıjaı qaldyrmaıdy.
