Infografıkany jasaǵan – Záýresh Smaǵul, «EQ»
Memlekettik kórsetiletin qyzmetter sapasyn baqylaý jáne memlekettik apparat qyzmetin bıýrokratııadan aryltý máseleleri týraly baıandama jasaǵan Memlekettik qyzmet isteri agenttigi tóraǵasynyń orynbasary Salaýat Múksimov: «Agenttik memlekettik qyzmet alýshylardyń quqyqtaryn qorǵaýǵa baǵyttalǵan aldyn alý sharalaryna basymdyq beredi. Osyǵan baılanysty júrgiziletin tekserýler qyzmet berýshilerdiń quqyqqa qaıshy áreketteriniń sebepteri men jaǵdaılaryn anyqtaýǵa baǵyttalǵan», dedi.
Osy maqsatta ótkizilgen 195 profılaktıkalyq is-sharada 45 myńnan astam buzýshylyq anyqtalsa, onyń 58 paıyzy ákimdikterge tıesili bolǵan. Kórsetilgen buzýshylyqtar sanynyń 51%-y memlekettik qyzmet kórsetý merzimderin buzý (18,8%), artyq qujattardy talap etý (29,5%) jáne negizsiz bas tartýǵa (2,8%) baılanysty. Sondaı-aq jyl basynan beri agenttik sapasyz memlekettik qyzmet kórsetýge qatysty 629 ótinishti qaraǵan. Shaǵymdardyń kópshiligi memlekettik organdardyń jer qatynastary, sáýlet, turǵyn úı-kommýnaldyq sharýashylyǵy, jumyspen qamtý jáne áleýmettik qamsyzdandyrý salalarynda memlekettik qyzmetter kórsetý kezindegi is-áreketterine qatysty bolyp otyr. О́tinishterdi qaraý qorytyndysy boıynsha 181 kórsetiletin qyzmetti alýshynyń quqyqtary qalpyna keltirilgen.
Spıkerdiń aıtýynsha, kelip túsken árbir ótinishke jan-jaqty taldaý júrgiziledi. Odan bólek, azamattardyń múddeleri men suranystaryn eskere otyryp, kórsetiletin qyzmetti berýshilerdiń jumysy men tıimdiligi baǵalanady. «Qyzmet alýshylardyń quqyqtaryn proaktıvti túrde qorǵaý jáne qalpyna keltirýge erekshe nazar aýdarylady. Osylaısha, qyzmet alýshylardyń buzylǵan quqyqtaryn olardyń ótinishterin kútpesten proaktıvti túrde qashyqtan monıtorıng júrgizý jolymen qalpyna keltirý tájirıbesi iske asyrylyp keledi. Júrgizilgen monıtorıng nátıjesinde bas tartý sebepterin tolyq kórsetpeýdiń 571 faktisi anyqtaldy. Profılaktıka maqsatynda memlekettik organdarǵa kórsetiletin qyzmetti berýshiler tarapynan bolǵan júıeli buzýshylyqtarǵa jol bermeý jóninde usynymdardy qarastyratyn taldaý joldandy», deıdi S.Múksimov. Aıtalyq, jyl basynan 577 qyzmetker tártiptik jaýapkershilikke, al 298 memlekettik organdar men uıymdardyń basshysy ákimshilik jaýapkershilikke tartyldy. Memleket kirisine 22,1 mıllıon teńge óndirilgen.
Sonymen birge agenttik jyl saıyn qoǵamdyq monıtorıng júrgizedi. Onyń aıasynda memlekettik qyzmetterdiń sapasy men qoljetimdiligine qatysty halyq pikiri, múddesi, usynystary men qalaýy zertteledi. Odan bólek, «elektrondyq úkimet» portalynda onlaın saýaldama iske qosylǵan. Onda kez kelgen azamatqa usynylǵan memlekettik qyzmettiń sapasyn óz betinshe baǵalaýǵa múmkindik qarastyrylǵan.
Memleket basshysynyń tapsyrmalaryn oryndaý maqsatynda agenttik memlekettik apparatty bıýrokratııadan aryltý jóninde sharalar qabyldap, bul baǵytta júrgizilgen monıtorıng pen taldaý nátıjesinde 373 usynys ázirlengen. Bul usynystar bıznes-úderisterdi reınjınırıngteý, artyq quqyqtyq retteýdi, joǵary talaptardy alyp tastaýǵa, fýnksııalardy ortalyqsyzdandyrýǵa jáne laýazymdy tulǵalardyń derbes jaýapkershiligin kúsheıtýge baǵyttalǵan.
