Talapty da talantty jastyń jyr kitaby, aýdarmalary men maqalalary toptastyrylǵan qos jınaqtyń tusaýy Astanadaǵy Ulttyq murajaıda kesildi. Jas aqyn ádebı kesh ataýyn «Aıdyń appaq júregi» dep atapty. Sol júrekke kirshik túspese, óleń de móldir.
Aqyn-jazýshylar – Suraǵan Rahmetuly, Aıgúl Kemelbaeva, Qalqaman Sarın, Ularbek Nurǵalymuly, Maqpal Mysa jas daryn kitaptarynyń tusaýkeser rásimin jasady. Alpamys ortaǵa Oralyn jyrlap shyqty. «Oralda bári ózgeshe» degen onyń jyrlarynan týǵan dalasynyń ósimdigine deıin tys qalmaǵanyn kóremiz. Grekterdiń dalasyna baryp Baıbarys sultannyń saǵynyshyn jyr etkeni súısindiredi. Qypshaq dalasynyń bir túp jýsanyna ińkár bolyp ótken uly júrektiń rýhyn búginge jalǵaýǵa tyrysqan jastary bar el órkendese kerek. Uly murat, armandary tereńnen tamyr tartqan ult ýaqytqa tótep beredi, talantty jastarynyń arqasynda. Aldyńǵy býyn aǵalar jas aqynǵa sondyqtan úmit artyp kelip otyr.
Kesh barysynda sóz sóılegen «Egemen Qazaqstan» gazetiniń bas redaktory, belgili jýrnalıst Ǵabıt Músirep: «Búgingi jastarǵa qýanamyz. Kózderinen jalyn kóremiz. Jastardyń bulaı kesh ótkizgeni qazaq ádebıetiniń erteńinen úmittendiredi. Úlken-úlken aǵalaryń kelip qoldap jatqanynyń ózi ádebıetke degen kózqaras pen jaýapkershilikti kórsetedi. Jańa óleńińde aıtyp jatyrsyń ǵoı, «dop qýǵan bala búgin oı qýyp júr» dep. Oıyń da, óleńiń de ózgeshe bolyp, ádebıetten óz ornyńdy alý jazsyn», dedi.
Jıynda belgili jýrnalıst Serikqalı Muqashev ta sóz sóıledi. Ádebı kesh jas aqyn jyrlarymen kómkerilip, ánder shyrqaldy.
