Foto: Ashyq derekkóz
Áýeli, myna suraqqa jaýap izdep kóreıikshi. Jańa ǵasyrdyń jańashyl ustazy qandaı bolý kerek? Bizdińshe, kún sanap túrli keıipke engen, san aýlan aqparattardy eshqandaı súzgisiz qoǵamnyń sanasyna quıǵan zaman úderisine erkin boılaıtyn jan ǵana óz isiniń kásibı sheberi atanbaq. Ustaz ýaqytpen qatar tolassyz damyp, taýys qusyndaı túrlenip otyrýy shart. Áıtpese siz shákirtińizdi qyzyqtyra almaısyz. Biz mundaı erekshelikterdi oblystyq «Jetisý ustazy – 2023» baıqaýynyń jeńimpazy Ińkár Raqmanovanyń boıynan kóre aldyq. Bilim báıgesinde óziniń sabaq berý ádisi arqyly salanyń bilikti mamandarynyń ystyq yqylasyna ıe boldy. Ustazdyq jolǵa túskenine kóp bolmasa da kreatıvti ıdııalary arqyly óz isiniń sheberi ekenin dáleldedi. Osylaısha óńirlik bilim básekesinde oq boıy oza shaýyp, avtokólik ıesi atandy.
«Jetisýda zaman órisinen óz jolyn taba bilgen, daryndy mamandar kóp. Dese de Ińkár jahandyq bilim keńistigindegi jańashyldyǵymen dara shapty. Biz baıqaýda pedagogtiń daryn deńgeıin, shyǵarmashylyq qabiletin, zııattylyq sheberligin baǵamdadyq. Qazir, óńirde kreatıvti jastar bilim salasyna basqa rakýrstan qarap, qundylyǵyn eseleýde. Biz osyndaı ustazdarymyz baryna qýanamyz», deıdi oblystyq bilim basqarmasynyń basshysy Marat Súleımenov.
Ińkárdiń basty qasıeti – izdenimpazdyq. Qaı ýaqytta da syn turǵysynan oılaı alatyn, isker hám shyǵarmashyl jas. Aıryqsha ıdeıalar berýge, oılaýdyń dástúrli shemalarynan basqa jol tabýǵa, problemalyq jaǵdaıattardy tez sheshýge qabilettiligimen ózgeshe. О́z mamandyǵyn janyndaı súıetin adam ǵana ózgemen erkin til tabysa alady. Búginde oqýshy júregine jol taba bilý de úlken óner. Muny paıymdy pedagog jetik meńgergen. Ýnıversıtette oqyp júrgen kezinen bilimge qushtarlyǵy qatarynyń aldy bolýǵa jeteleıdi. Muny tálimgeri Qazaqstannyń eńbek sińirgen ustazy Tatıana Mıhaılovna Stankevıch te moıyndap otyr.
«Táýekelshil talaptyń qanatyn erkin qaǵýyna kómek berý árbir muǵalimniń paryzy. Biz ǵylym men tehnıka damyǵan, óner-bilimniń túrli salasynda tyń jańalyqtar asa qarqyndy úrdispen ashylyp jatqan qoǵamda ómir súrip jatyrmyz. Demek osy kezeńde zamanyna saı urpaq tárbıelep, jetildirip shyǵarý úshin jan-jaqty bilim jáne tárbıe berýmen aınalysý óte jaýapty is. Men Ińkárdiń boıynan osy minezdi kóremin», deıdi T.Stankevıch.
Bilikti pedagog 2016 jyly I.Jansúgirov atyndaǵy Jetisý ýnıversıtetin bıologııa mamandyǵy boıynsha úzdik bitirgen. Qolyna dıplomyn ala salyp, ózi týyp ósken mekenge qyzmet etýge bel býady. Kóp uzamaı Sarqan qalasyndaǵy №1 mektep-gımnazııasyna bıologııa páni muǵalimi bolyp jumysqa ornalasady. Búginde jalpy jumys ótili – 8 jyl, biliktilik sanaty – pedagog-sarapshy. Osy ýaqyt aralyǵynda óz kásibı sheberliginiń nátıjesinde jetken jetistikteri jeterlik. Sonyń dáleli – Jetisýdyń úzdik ustazy atanýy.
«Qazir jahandyq aqparattyń damyǵan kezeńi. Zamanǵa saı elimizdegi barlyq salada jańashyldyqtar engizilýde. Máselen, bilim berý mekemeleri sandyq júıege kóshirilip, jaratylystaný pánderin aǵylshyn tilinde oqytýdy qolǵa alýda. Úshtildi oqytý – jas urpaqtyń bilim keńistiginde erkin samǵaýyna jol ashatyn, álemdik ǵylym qupııalaryna úńilip, óz qabiletin tanytýyna múmkinshilik beretin eń basty qajettilik», deıdi keıipkerimiz.
Onyń halyqaralyq, respýblıkalyq baıqaýlarda top jaryp, aýdannyń ǵana emes, óńirdiń bilim salasyna úlken jańalyq ákelgeni kóptiń kóńilinde. Jeke avtorlyq jobalary sheteldikterdiń de qyzyǵýshylyǵyn týdyrýda. «Biology in English» fakýltatıvtik kýrsy baǵdarlamasynyń avtory retinde áriptesteriniń qurmet-qoshemetine ıe boldy. Biz jańashyl ustazdyń áli de alar asýy alda ekenine kúmán keltirmeımiz. Kreatıvti mamannyń qoǵamǵa berer qundylyǵy kóp, bul zaman aǵymyna ilesken árbir oqýshy úshin de mańyzdy.
Jetisý oblysy
