Bul másele oblys ákimi Serik Shápkenov ótkizgen jıynda arnaıy qaraldy. Maqsat – áleýmettik mańyzy bar azyq-túlik taýarlarynyń baǵasyn turaqtandyrý.
Oblystyq kásipkerlik jáne ónerkásip basqarmasynyń basshysy Polymbet Hasanovtyń aıtýynsha, jyl basynan beri sharýa qojalyqtarynyń jetekshilerimen áleýmettik mańyzy bar azyq-túlik ónimderin tutynýshyǵa tıimdi baǵamen ári jetkilikti mólsherde qamtamasyz etý maqsatynda 284 memorandýmǵa qol qoıylypty. Biraq turǵyndardyń basym bóligi satyp alatyn bul azyq-túliktiń baǵasyn ósirip otyrǵan tıimsiz deldaldar bar. Maýsymaralyq kezeńde ımporttyq taýarlardyń baǵasynyń kóterilýinen 8 azyq-túliktiń qymbattaǵany baıqalady. Azyq-túlik baǵasyna 15 paıyzdan ústeme qosyp, dúkenge deıin tasymaldaǵan 19 kásipkerlik sýbektisine Ákimshilik quqyq buzýshylyq týraly kodeksiniń 204-4-babyna sáıkes ákimshilik hattamalar toltyrylǵan.
«Atyraý» áleýmettik-kásipkerlik korporasııasy» AQ-nyń basqarma tóraǵasy Danııar Tahanovtyń aıtýyna qaraǵanda, turaqtandyrý qoryn tolyqtyrý úshin 2020-2022 jyldary 3,1 mlrd teńge bólingen. Al áleýmettik mańyzy bar azyq-túlik taýarlarynyń baǵasyn turaqtandyrý úshin jergilikti saýda núktelerimen 10 kelisimshart jasalǵan.
«Áleýmettik mańyzy bar azyq-túliktiń 18 túrin satýǵa eki saýda jelisimen úsh kelisimshart jasaldy. Kelisimsharttyń somasy – 968 mln teńge. Azyq-túliktiń satý baǵasy naryqtyq qunynan 10 paıyzǵa tómen. Mundaı azyq-túlikter 38 saýda núktesinde satylady. Máselen, Atyraý qalasynda – 32, Jylyoı men Qyzylqoǵa aýdanynda – 2, Maqat pen Inder aýdanynda 1 saýda núktesi bar. Taýarlardyń baǵasyna apta saıyn tekserý júrgizemiz», deıdi D.Tahanov.
Alaıda oblys ákimi apparatynyń ıspektorlary júrgizgen taldaý nátıjesine súıensek, turǵyn úıler janyndaǵy dúkenderde áleýmettik mańyzy bar azyq-túliktiń baǵasy qymbat ekeni anyqtalǵan. Demek oblys ákimi S.Shápkenovtiń pikirinshe, sala basshylary áleýmettik mańyzy bar azyq-túlikterdiń baǵasyn turaqtandyra almaı otyr. Azyq-túlik taýarlaryna baǵa belgileý tizbegine qatysty deldaldyq shemalardy tekserý jónindegi komıssııanyń jumysy tıisti deńgeıde uıymdastyrylmaǵan.
«Bizdiń basty mindetimiz – azyq-túlik baǵasyn turaqtandyrý. Memleket basshysy 2023 jyldyń sońynda ınflıasııa deńgeıin 10%-dan aspaıtyn dálizde ustap turý týraly tapsyrma berdi. Baǵany ósirmeý týraly jasalǵan memorandýmdarda bári keremet. Al onyń talaby qanshalyqty oryndalyp otyr? Osy kezge deıin jasalǵan ár memorandýmnyń oryndalysyn teksergen jón. Ústeme baǵany 15 paıyzdan artyq qosatyn deldaldardy jaýapkershilikke tartý kerek. Atyraý qalasyndaǵy, aýdandardaǵy negizgi saýda núktelerinde baǵa birdeı bolýǵa tıis. Iri sýpermarketterde azyq-túlik tómen baǵamen satylyp jatyr. Biraq turǵyndar arzan azyq-túlikti izdep júrmeıdi ǵoı. Úı mańyndaǵy dúkenderden satyp alady. Munda taýar baǵasyna eki ese qosylyp otyr», dedi S.Shápkenov.
Atyraý oblysy
