Qarasha aıynan bastalǵan ekpe jumystary Qonaev qalasynda da qarqyndy júrgizilýde. Búginde 982 bala ekpe aldy. Jospar boıynsha 4 453 bala ekpe alýy kerek. Bul týraly Qonaev qalalyq aýrýhanasynyń epıdemıolog-dárigeri Erlan Sarjanov aıtty. Dárigerdiń sózinshe, kez kelgen aýrýdyń aldyn alý úshin ekpe alý kerek. Sol sebepti Qonaevta balalardy qosymsha ımmýndaý júrip jatyr. Onyń ishine 6 aıdan 11 aıǵa deıingi, 2-5 jas aralyǵyndaǵy balalar kiredi. Budan bólek, qyzylshaǵa josparly egý (1-6 jas aralyǵy) júrgizilip jatyr.
«О́tken aptanyń jeksenbisinde 1 500 dana ekpe ákelindi. Sondaı-aq medısınalyq qyzmetkerler de qyzylshaǵa qarsy vaksına alyp jatyr. Qaladaǵy epıdemııalyq jaǵdaı turaqtalǵansha qosymsha ımmýndaý prosesin toqtatpaımyz. Shaharǵa qarasty Sheńgeldi jáne Zarechnyı aýyldyq okrýgterindegi turǵyndar da vaksına ala alady. Bul úshin medısınalyq qyzmetkerlerge júginýge tıis», dedi epıdemıolog.
Al juqpaly aýrýlar bóliminiń jalpy tájirıbe dárigeri Nurǵazy Shamuratovtyń aıtýynsha, atalǵan bólimge dene qyzýyna, jótel men álsizdikke shaǵymdanyp kúnine 20-25 naýqas keledi.
«Qyzylsha juqtyrǵandardyń kóbi – 1 jasqa deıingi balalar. Aýrýy asqynǵandardy birden stasıonarlyq emdeýge jatqyzyp jatyrmyz. Al keıbir naýqastar úı jaǵdaıynda emdelýde. Olardyń jaǵdaıyn baqylaýda ustap otyrmyz. Buǵan deıin aýrýhanadan emdelip shyqqandardyń sany 100-den asady», dedi dáriger.
Jyl basynan beri Qonaev qalasynda qyzylshamen aýyrǵandar sany 157 bolsa, olardyń ishinde 19-y ambýlatorly em alyp, 138-i juqpaly aýrýlar bólimshesine jatqyzylǵan.
Elimizde 6 qarashadan qyzylshaǵa qarsy qosymsha jappaı ımmýndaý bastaldy. 23 qarasha kúni Qazaqstanǵa qosymsha jappaı ımmýndaý júrgizý úshin 500 myń doza mólsherinde qyzylshaǵa, qyzamyqqa jáne parotıtke qarsy vaksına (QQP) partııasy keldi. Birinshi kezekte 6 aıdan 11 aıǵa deıingi balalar ımmýndaýǵa jatady. Jeltoqsannan bastap egý mártebesine qaramastan 2 jastan 5 jasqa deıingi balalardy, medısına qyzmetkerlerin (55 jasqa deıin), sondaı-aq profılaktıkalyq egýdi ótkizip alǵan 18 jasqa deıingi adamdardy qyzylshaǵa qarsy qosymsha ımmýndaý josparlanǵan.
Kún sýytqaly tumaý epıdemııasy da keń taralyp jatyr. Bul kezeńde ımmýnıtetti nyǵaıtý, dárýmenge baı taǵam túrlerin paıdalanýmen qatar, naýqastarmen jaqyn qarym-qatynasta bolmaý syndy qarapaıym qaǵıdalardy saqtaýdy este ustaǵan abzal. «Saqtansań – saqtaıdy» degendeı, búginde tumaýǵa qarsy 6 974 adam ekpe alǵan. Onyń 5 815-i – eresekter.
Almaty oblysy
