Foto: ©AIBA
«Hanchjoýda ótken Azııa chempıonatynda ózbek myqtysy, álem chempıony, Rıo Olımpıadasynyń jeńimpazy, Vel Barker kýbogynyń ıegeri, Azııa oıyndarynyń chempıony Hasanboı Dýsmatovpen aıqasta barymdy saldym. Tipti 1-raýndta ol meniń soqqymnan teńselip te ketti, biraq tóreshi nokdaýn ashqan joq. Tipti bes tóreshi de 1-raýndta jeńisti Dýsmatovqa berdi. Bizdiń qurǵan taktıkamyz múlde basqa edi. 1-raýndta basym tússek, ol 2,3-raýndta órshelenip maǵan atylady, sol kezde qarsy soqqymen desin basamyz dep edik. Tóreshiler tipti 2-raýndta da oǵan berdi. 3-raýndta ne bel keter, ne belbeý keter dep jantalasa umtyldym. Dýsmatovty buǵan deıin qazaq boksshylary jeńe almaı júrgende men 2021 jyly Serbııada ótken álem chempıonatynda uttym, jankúıerler tóbemdi kókke jetkize maqtaýymdy asyrdy. Utylyp qalyp edim, jer qylyp túrli jaǵymsyz pikir jazyp jatyr. Men esemdi qaıtaramyn. Taǵy da aıtam, ol osal boksshy emes, beker adam Olımpıada altynyn oljalamaıdy.
Bıylǵy súreńsizdiktiń basty kináraty – jaraqatym. Byltyrǵy jyldyń sońynda Saryaǵash shıpajaıynda ulttyq qurama boksshylary jaıdarmanshylarǵa qarsy fýtbol oınadyq. Sol oıynda ońbaı qulap, buǵanam syndy. Súıegim úsh jerinen bólinip ketken eken, áli temirmen júrmin, jeti jerden shegemen ustap tur. Byltyrǵy jyldyń 28 jeltoqsanynda ota jasady, dárigerler 9 aıǵa deıin jattyǵý jasaýǵa, kúsh túsirýge bolmaıtynyn qatań eskertken, biraq ota jasalǵan soń 1,5 aıdan keıin jattyǵýdy bastadym. Áli súıek tolyqtaı bitken joq, sol ıyǵymdy oqys qozǵasam, temir qajap aýyrady. Ony kimge aıtyp shaǵymdanasyń? Bıyl álem chempıonatynda, jazǵy Azııa oıyndarynda jolymnyń bolmaýynyń negizgi sebebi osy», dedi Sáken Bıbosynov.
Álem chempıony oqý-jattyǵýynan tys kezde úı sharýasyn atqaratynyn, anasy men jaryna qolǵabys etetinin aıtty. «Men álem chempıony edim» dep shirenbeı jora-joldastarynyń asaryna da baryp qol kómegin kórsetýde tartynbaıtynyn jetkizdi.
