Qys qysyp tur: Eki aýdanda tótenshe jaǵdaı jarııalandy

Qys mezgiline daıyndyq ju­mystary sátimen júrgizilgenine qaramastan, Jambyl aýdanynyń aýmaǵyndaǵy birneshe aýyl turǵyndary, 980 úı kógildir otynsyz qaldy. Jergilikti atqarýshy bılik tarapynan bul másele jedel baqylaýǵa alyndy. 12 jeltoqsan kúni isten shyqqan magıstraldy gaz qubyryn qalpyna keltirý ju­mystary óńir basshysy Erbol Qa­rashókeevtiń nazarynan tys qal­ǵan joq. Tıisti jumys atqaryldy.

Aýa raıynyń kúrt ózgerýi 14 jeltoqsannan 15 jeltoqsanǵa aýǵan túni de jalǵasty. Jal­py alǵanda, qar aralas boran men tuman saldarynan 12 jeltoq­sannan bastap, «Batys Eýropa – Batys Qytaı» avtodálizi bo­ıyndaǵy «Taraz – Almaty» baǵy­ty boıynsha jáne oblystyq ma­ńyzy bar birqatar jolda kólik qozǵalysy toqtatyldy. 13 jeltoq­sannan bastap óńirlik jedel shtab qurylyp, tıisti jumystar júrgizilip jatyr.

14 jeltoqsannan 15 jeltoq­sanǵa aýǵan túni Qordaı aýdanynda jaǵdaı kúrt ózgerdi. Borandy kúnde jolǵa shyqqan azamattardy qutqarý jumystary bastalyp ketti.

«Qutqarý jumystaryna 117 arnaıy tehnıka, 103 arnaıy maman jumyldyryldy. 14 jeltoqsan kúni saǵat 23.00-degi jaǵdaı bo­ıyn­sha qutqarý bólimshelerimen 1279 adam qutqarylyp, evakýa­sııalandy. Olar Qordaı aýda­nyndaǵy 6 jylytý pýnktine ornalastyryldy (Qaınar-1, Alǵa-1, Qordaı-3, Kenen-1). Áli de qar qursaýynda qalyp otyrǵan kó­likterdiń sany naqtylanyp jatyr. Qatty jel men qalyń qardyń saldarynan Shý aýdanynda elektr jelileri úzildi.

Tótenshe jaǵdaı saldarynan «Shý Otar» ýchaskesinde 11 jolaý­shy poıyzy toqtap tur, olardyń árqaısysynda ortasha eseppen 500-700 adamnan bar. 12 júk po­ıyz­y óz ýaqytynan keshigip jatyr. Oblystyń 4 aýdanynyń 32 eldi mekeninde 8 882 abonent elektr qýatynan ajyratylǵan. Qazirgi kezde jeldiń jyldamdyǵy sekýndyna 45 metrge deıin jetken», delingen oblys ákimdiginiń bas­pasóz qyzmeti taratqan bas­tapqy málimette.

Sońǵy derekterge júgin­sek, 15 jeltoqsannyń ala tańynda mamandardyń ábjil qımy­lynyń arqasynda 2 413 adam qutqa­ry­lypty. Olardyń ishinde 90 bala bar. Sondaı-aq 600-ge jýyq azamat úıine qaıtqan. 1 813 azamat alty eldi mekendegi jylytý pýnktterine jetkizilgen. Maman­dar 3 azamatty Qordaı aýda­nynyń ortalyq aýrýhanasyna aparǵan. Olardyń jaǵdaıy turaqty kórinedi. Jalpy alǵanda, eki táýliktiń bederinde 5 000 adam qutqarylǵan.

«Qazirgi ýaqytta Qordaı jáne Shý aýdandarynda qosymsha 825 oryndyq 9 jylytý pýnkti uıymdastyrylǵan. Qutqarý shara­laryna 171 adam jáne 76 birlik tehnıka jumyldyrylǵan. Jol­daǵy blok-beketterge polısııa narıadtary qoıylǵan.

Elektr jelilerin qalypqa keltirý boıynsha «Jambyl elektr jelileri» JShS-men 23 ava­rııalyq-qutqarý toby, 27 arnaıy tehnıka jumyldyryldy. Gaz qubyrlarynyń apaty tirkelgen joq, shtatty rejimde berilgen.

Tótenshe jaǵdaıǵa baılanysty «Shý-Otar» ýchaskesinde 11 jolaýshy poıyzy toqtap qalǵan bolatyn. Shý aýdandyq kólik pro­kýratýrasynyń aqparaty bo­ıyn­sha, qazirgi kezde jolaýshylar poıyz­dary júre bastaǵan», delingen resmı málimette.

О́ńir basshysynyń sheshimimen 14 jeltoqsanda Qordaı jáne Shý aýdandarynyń aýmaǵynda tabıǵı sıpattaǵy tótenshe jaǵdaı jarııalandy. Qazirgi tańda qaýyrt jeli nómirleri úzdiksiz jumys istep tur.

Qysqy maýsymǵa daıyndyq jumystary kúni buryn pysyq­talǵanymen, óńirde gaz qubyrynyń isten shyǵýy jurtty kádimgideı alańdatty. Jambyl aýdanynyń keıbir eldi mekenderindegi jaǵdaı kópke sabaq bolsa dep otyr­ǵa­ny­myzda, Turar Rysqulov aýda­ny­nyń ortalyǵy Qulan aýylynyń kireberisindegi kóshe turǵyndary da kógildir otyn men aýyz sýsyz qalǵanyn aıtyp habarlas­ty. Aby­roı bolǵanda jergilikti at­qarýshy bıliktiń jedel iske kiri­sýimen gaz berilgen kórinedi. Aýyz sý da tún ortasynan aýǵanda qosyldy.

«Bıyl qys bolmaıdy eken» dep jaıbaraqat júrgen turǵyndar alǵashqy qardyń ózinde ábigerge túsip otyr. Aıaz saldarynan jol apaty da jıiledi. Qalaı desek te qytymyr qystyń alǵashqy aıazy jergilikti bılikti de bir synap aldy. Daıyndyq jumystarynyń qaı deńgeıde júrgizilgenin kór­setip bergendeı boldy.

Jambyl oblysy