Sýretti túsirgen – avtor
Altaı taý shańǵy klasteri elimizdiń týrıstik kartasynyń Top-50 aımaǵynyń tizimine enedi. Ense, engendeı-aq. Shyǵystaǵy shańǵy bazalarynyń qaı-qaısysyn alsaq ta, syrǵanaq tebemin degen týrısterge jan-jaqty jaǵdaı qarastyrylǵan.
– Qazir óńirde qysqy demalys túrlerin damytýǵa aıryqsha kóńil bólinip jatyr. Jalpy, bizdiń oblysta qysqy sport túrlerin, qysqy týrızmdi damytýǵa barlyq alǵyshart bar. Ásirese oblys ortalyǵynyń irgesindegi Glýbokoe aýdanyn mysal retinde keltirýge bolady. Bul aýdanda bir emes, birneshe demalys bazasy ornalasqan. Onda shańǵy tebýdi, shanamen syrǵanaýdy unatatyndar úshin barlyq jaǵdaı jasalǵan. Búgingi is-sharaǵa jınalǵandar osyǵan taǵy bir márte kóz jetkize aldy, – deıdi oblystyq týrıstik-aqparattyq ortalyǵynyń basshysy Talǵat Dáýletov.
Iá, bıylǵy qysqy týrıstik maýsymnyń ashylý saltanaty ereksheligimen qonaqtardyń esinde qalatyn sııaqty. Bul kúni О́skemenniń irgesindegi «Nurtaý» taý shańǵy bazasyna kelgen demalýshylar shańǵy teýip, stıýbpen syrǵanap qana qoımaı, ıt shanamen de serýendedi. Tırde mergendikterin synap, túrli konkýrstarǵa qatysýǵa múmkindik aldy. Sonymen qatar óńirdegi qolóner sheberleri jasaǵan buıymdardyń kórme-jármeńkesi uıymdastyryldy.
– Demalys kúnderi úıdiń kúıki tirligin ysyra turyp, bala-shaǵamyzben demalýdy daǵdyǵa aınaldyryp júrmiz. Búgin shańǵy tebýge keldik. Alańsyz demalysqa tıisti jaǵdaıdyń bári jasalǵan, – deıdi óskemendik Nurjan Kenje.
Budan bylaı tamasha tabıǵat aıasynda demalamyz degen qala turǵyndaryna, qonaqtarǵa shańǵy bazalarynyń esigi aıqara ashyq. Shyǵysta shańǵy tebemin deseńiz, tańdaý kóp.
Shyǵys Qazaqstan oblysy
