Shynynda da, bul aýdan turǵyndarynyń uıymshyldyǵy, ásirese mádenıetke erekshe kóńil bóletini kópten aıtylyp kele jatyr. 2023 jyly ǵana mektep túlekteri men mesenattardyń demeýshiligimen aýdanda 77 mln 400 myń teńge qarajatqa 45 joba júzege asqan.
Aıtpaqshy, Batys Qazaqstan oblysynda jekelegen azamattardyń kúshimen ashylǵan úsh aýyl mýzeıi bolsa, sonyń úsheýi de osy Qaztalov aýdanynda. Olar – Kókterek, Aqpáter jáne Qoshankól aýlynda. Kókterek aýlyndaǵy mýzeı marqum ustaz Tólegen Seıitkereevtiń kúshimen ashylsa, Aqpáter mýzeıin eńbek ardageri Kárim О́teǵulov quraǵan. Al Qoshankól aýlyndaǵy halyqtyq mýzeıdiń jádigerleri tek qana jylqy taqyrybyna jınaqtalǵan. Bulardan bólek aýdandyq tarıhı-ólketaný mýzeıi de qyzmet kórsetip tur.
Bıyl Qaztalov aýdanynda jańa bastama qolǵa alyndy. Iаǵnı jyl basynan aýdandaǵy 16 okrýgtiń ortalyǵyna «Qazaq radıosy» ornatylyp, kóshede sańqyldap sóılep turatyn boldy. «Aldaǵy jyly ózge eldi mekenderimizde de osy jumysty jalǵastyramyz», deıdi aýdan ákimi.
Aýdan basshysynyń aıtýynsha, bıyl 29 mln 295 myń teńge qarajat bólinip, aýdanda mádenıet úıleri men klýbtarynyń materıaldyq-tehnıkalyq bazasy jańartylǵan. Qaıyńdy aýlynda jańa mádenıet úıi salynyp jatsa, Qarasý men Qoshankól mádenıet úılerin kúrdeli jóndeýge, Qaraózende kópbeıindi mádenı-sport keshenin salýǵa jobalyq-smetalyq qujattama jasalyp jatyr eken.
Bıyl jazda aýdan ortalyǵynda saıası qýǵyn-súrginge ushyraǵan jerles qaıratker Mansur Ǵataýllınge arnap «Beseýdiń haty» obelıskisi ashylǵanyn budan buryn jazǵan bolatynbyz. Sondaı-aq «Meniń kishi Otanym» aýdandyq tarıhı-tanymdyq ekspedısııasy uıymdastyrylyp, 3 kezeń boıynsha zertteý jumysy júrgizildi. 16 aýyldyq okrýgti qamtyǵan ekspedısııa barysynda 200-den asa kóne qulpytas, erte temir dáýirine jatatyn 100-ge jýyq oba, ortaǵasyrlyq qala oryndary anyqtalyp, qundy jádigerler men keńestik dáýirdegi eskertkishter tabyldy. Sonymen qatar birqatar ortaǵasyrlyq turaq anyqtalyp, jádiger jınaqtaldy. Bul jumystardyń qorytyndysy úlken ǵylymı-tájirıbelik konferensııamen qorytyndylandy.
Qaztalov aýdandyq ortalyqtandyrylǵan kitaphanalar júıesiniń 39 kitaphanasy bar ekenin aıtqanbyz. Bulardyń ishinde 6 kitaphana zamanaýı úlgide jabdyqtalǵan. Jyl ishinde 1140 shara ótip, 94 000 kórermen qamtylǵan eken.
Aýdanda jas býyndy kitapqumarlyqqa baýlýdyń keremet úrdisi qalyptasyp keledi. Bıyl oqýshylardyń jazǵy demalysy kezinde «Men oqyǵan 30 kitap» atty joba jarııalanyp, oǵan 5-11 synypta oqıtyn kitapsúıer 34 oqyrman qatysty.
Demeýshilerdiń kúshimen 1 mıllıon teńge júlde qory tigilgen baıqaýdyń qatysýshylaryna arnaıy dıplom, 30 myń teńgelik sertıfıkat tabys etildi. Al kitap oqýda ozyp shyqqan Jansaıa Beket – 300 myń teńge, II oryn júldegeri Ilııas Qaısaǵalı – 200 myń, al júldeli III orynǵa ıe bolǵan Tolǵanaı Qydyrǵalıeva men Aıym Tolıattı atty oqyrmandar 100 myń teńgelik sertıfıkatqa ıe boldy.
«Bul saıysty 2024 jyly oblystyq deńgeıde ótkizetin bolamyz», deıdi aýdan basshysy.
Batys Qazaqstan oblysy
