Halyqqa nesıe beretin, olardan depozıt jınaıtyn, túrli tólemder júrgizetin ózimizge úırenshikti ekinshi deńgeıli bankterdiń bıylǵy jyldyń on aıyndaǵy paıdasy 1,78 trln teńgege jetip, byltyrǵy jyldyń sáıkes kezeńimen salystyrǵanda 53,8%-ǵa artyq shyqty. Atalǵan bankter ondyǵyndaǵy eń jaqsy kórsetkish Otbasy bankinde, birden plıýs 62,8%. Jyl ishinde 127,8 mlrd teńgeni quraǵan.
О́tken jyly osy banktiń taza paıdasy 96 mlrd teńgeni qurap, ósim 46%-ǵa jetken. Túrli operasııalardy qamtamasyz etetin qarjy naryǵyndaǵy belsendiligi birqalypty. Tıimdi turǵyn úı qurylys jınaq júıesi jáne qoljetimdi turǵyn úımen qamtamasyz etýdiń jańa memlekettik baǵdarlamasy arqasynda Otbasy banki jurtshylyqty qoldaýdyń mańyzdy ınstıtýtyna aınalyp otyr deýge bolady. Búginderi Turǵyn úı qurylys jınaq júıesine qatysýshylardyń sany artyp, banktiń depozıttik bazasy men nesıeleý kóleminiń ulǵaıýy joǵary tabystylyq kórsetkishterge jetýde. Atalǵan bank ótken jyly tolyq paıdanyń 70 paıyzyn nemese 67,2 mıllıard teńgeni dıvıdent túrinde «Báıterek» ulttyq basqarýshy holdıngine aýdarǵan. Bul – barlyq «Báıterek» UBH» AQ kompanııalary arasyndaǵy eń mańyzdy soma. Aldynǵy jyly da bul qarjy ınstıtýty óziniń taza tabysynyń shamamen 50 paıyzyn nemese 32,9 mıllıard teńgeni bas kompanııaǵa dıvıdendter tóleýge bólgen.
Al kiristik ósimi jaǵynan eldegi iri bankter arasynda Kaspi Bank ekinshi orynda. Bir jyl ishinde – 33,8%, 390,9 mlrd teńge. Úzdik úshtikti Eýrazııalyq bank 26,3%-ben qorytyndylaıdy. Kiristik ósim 97,2 mlrd teńgeni quraǵan.
Paıyzdyq kórsetkishi tómen Halyq banki –25,2%, Jusan Bank – 24,1%, Bank RBK – 20,3% jáne ForteBank (10,7%) ósim kórsetti. Bıyl birde-bir qarjy ınstıtýty eshqandaı shyǵyn kórsetpedi. Bir jyl buryn ekinshi deńgeıli negizgi bankterdiń ishinde Bereke banki (otandyq bankterdiń tobyna kirgen burynǵy reseılik Jınaq banki) belgili sebeptermen shyǵynǵa ushyraǵan bolatyn. Alaıda bıyl qarjy ınstıtýty óz ornyn qalpyna keltirip, az da bolsa 19,4 mlrd teńge kóleminde paıda túsirdi. EDB arasynda eń iri bank sanalatyn SentrKredıt Banki byltyrǵy jylmen salystyrǵanda nebári 115,1 mlrd teńgege tólem jasap, bir jyl burynǵy kórsetkishinen birden 13,9%-ǵa azaıdy.
