Atyraý qalalyq turǵyn úı-kommýnaldyq sharýashylyq bóliminiń sektor meńgerýshisi Nurjan Saıasattyń aıtýynsha, bul baspanalar apatty turǵyn úılerdiń tizimine tirkelip, jol kartasy jasalǵan. Maqsat – eski úılerdiń turǵyndaryn jańa baspanamen qamtý.
«Qalalyq ákimdiktiń bıýdjetinen apatty úılerdiń ıelerine «Modern» turǵyn úı kesheninen jańa páterler satyp alyndy. Jyl sońyna deıin taǵy bir apatty jaǵdaıdaǵy eski turǵyn úıdiń ıeleri jańa baspanaǵa kóshiriledi», dedi Nurjan Saıasat.
Jańa qonysqa kóshken turǵyndardyń qatarynda Irına Galıch te bar. Onyń otbasy 53 jyl buryn salynyp, keıin apatty jaǵdaıǵa ushyraǵan úıde uzaq jyl turǵan.
«Buryn eki qabatty eski úıdegi ár kúnimizdi ýaıymmen ótkizýshi edik. Ásirese balalarymyz úshin qorqyp, janymyzdy shúberekke túıip júrdik. Uıqymyz da tynysh bolmaıtyn. Endi, mine, kópten kútken qýanyshqa keneldik. Jańa páterge ıe bolyp, qıyndyqtyń artta qalǵanyna qýandyq», dedi Irına Galıch.
Jańa páterdi kóp kútkenderdiń qatarynda Aıgúl Bekesova da bar. Ol otbasymen 1947 jyly paıdalanýǵa berilgen eski úıde turǵan. Osy kezge deıin qulaý qaýpi tóngen baspanany 9 otbasy panalap kelgen.
«Eski úıde turýdyń qıyndyǵy kóp. Ár kúnimiz ýaıymmen ótetin edi. Biraq jańa baspana alýdan úmitimizdi úzbedik. Sol úmitimiz aqtalyp, jańa páterge ıe boldyq. Ásirese balalardyń qýanyshynda shek joq», deıdi Aıgúl Bekesova.
Atyraý oblysy
