Qaı kezde de esirtki bıznesine qarsy kúrestiń tıimdiligin arttyrý isi – ózekti. Bul máselege «Amanat Tech» músheleri birqatar ıntellektýaldy IT-sheshimder, onyń ishinde jelidegi esirtkiniń taralýyn baqylaýǵa arnalǵan arnaıy baǵdarlamalar usyndy. Bul tehnologııalyq quraldardy esirtkini onlaın-keńistikte satý týraly habarlandyrýlardy joıý men quqyq qorǵaý organdaryna tıisti aqparatty berý úshin paıdalanýǵa bolady.
«Alańda qoǵamdaǵy eń ótkir máseleniń biri esirtkige qarsy kúres máselesi talqylandy. Jobalar tıimdi jáne ońtaıly sheshim túrinde usynylatyn bolady. Biz jastardan nashaqorlyqpen kúresýdiń túrli joly týraly bildik. Sebebi bul másele jastardy ýlap jatyr. «Amanat Tech» sheńberinde jobanyń aýqymyn keńeıtý jáne Qazaqstannyń barlyq óńirin qamtý josparlanyp otyr. Árıne, birinshi kezekte qatysýshylar tarapynan suranysty eskeretin bolamyz», dedi partııa hatshysy Eldar Jumaǵazıev.
Hakatonnyń jalpy júlde qory 4,4 mln teńgeni qurady. Birinshi orynǵa 1,4 mln teńge, ekinshi orynǵa 1 mln teńge jáne úshinshi orynǵa 800 myń teńge bólindi. Sondaı-aq eki atalym «Best market ready solution» jáne «The best scaling potential» boıynsha 600 myń teńge syıaqy tabystaldy.
«Bul hakaton – ınnovasııalyq tehnologııa arqyly ózekti áleýmettik máselelerdi qalaı sheshýge bolatynyn kórsetetin naqty mysal. Biz jasampaz jastardyń nashaqorlyqqa qarsy tıimdi kúreske baǵyttalǵan sheshimderge ınnovasııalyq ıdeıalardy qalaı engizetinin kórgenimizge qýanyshtymyz. Qatysýshylar tek jobalar quryp qana qoımaı, óz shabytyn qoǵamdy ózgertýge jumsaıdy. Bul jobalar qaýipsiz jáne qamqor qoǵam qurýǵa eleýli kómek kórsete alatynyna senimdimiz», dedi «Astana Hub» basqarýshy dırektory Danııa Ahmetova.
«Futurista» komandasy nashaqorlyqtan qutqaratyn «TuzyZhol» qosymshasyn jasap, hakatonnyń jeńimpazy atandy. Qosymsha psıhologter men áleýmettik qyzmetkerlerdiń keńesine kez kelgen ýaqytta qol jetkizýge múmkindik beredi. Qalpyna keltirilgennen keıin paıdalanýshylar portalmen ıntegrasııa arqyly oqý kýrstarynan ótip, jumys taba alady. Ekinshi oryndy dári-dármekterdi resepsiz satýdy azaıtýǵa baǵyttalǵan «PharmaTrace» jobasyn usynǵan «Antitox» komandasy ıelendi. Úshinshi oryn «Sheker emes» jobasynyń avtory, esirtki qylmysy týraly eskertetin bot-assıstentter júıesin usynǵan «Shalkyma» komandasyna buıyrdy. Al «Best Scaling Potential» atalymynda «Saqta» jobasymen «IB sila» komandasy jeńiske jetti. Olar nashaqorlyqpen kúresý úshin esirtki saıttaryn anyqtaıtyn baǵdarlamalyq qural – bilezikter oılap tapty. Internettegi esirtki satýshylarmen kúresýdiń jańa ádisin usynǵan «ACK» komandasy «Qarauyl-Best Market Ready Solution» atalymymen marapattaldy.
«Biz esirtki satýshy operatorlardyń trafıgine tosqaýyl qoıý arqyly buǵattaıtyn baǵdarlama jasadyq. Telegram ákimshiligi bul eseptik jazbany buǵattaý týraly ótinishti qarastyryp jatqanda, biz olardyń jumys isteýine jol bermeımiz, óıtkeni olar vırtýaldy klıentterdi naqty klıentterden ajyrata almaı qalady», dep túsindirdi óz jobasyn «ACK» komandasynyń múshesi Ýálıhan Aıǵojın.
