Halyqaralyq áskerı sport keńesi (CISM) men Ázerbaıjan Qorǵanys mınıstrligi uıymdastyrǵan jekpe-jekterge 18 elden kelgen 300-den asa sportshy qatysty. Birinshilik qorytyndysy boıynsha Qarýly kúshterdiń ókilderi «altyn», «kúmis» jáne eki «qola» oljalady.
Qorǵanys mınıstri general-polkovnık Rýslan Jaqsylyqov sporttaǵy joǵary jetistikteri úshin Amanǵalı Bekbolatovty «El qorǵany» vedomstvolyq medalimen marapattady. Sátti jekpe-jek ónerin kórsetkenderi úshin sportshylardy quttyqtap, qurmet gramotalaryn tabys etti.
«Senderdiń halyqaralyq birinshilikterdegi jeńisteriń men jetistikteriń – eldiń bedelin kóterýge qosqan úlesteriń. Armııa sportshylarynyń myqtylyǵy áskerimizdiń mártebesin arttyrýǵa yqpal eteri sózsiz», dedi ol.
Grek-rım stılindegi kúresten áskerı qyzmetshiler arasynda ótken álem chempıonatynda 55 kelige deıingi salmaqta armııa balýany Amanǵalı Bekbolatovqa teń keler eshkim bolǵan joq. Erkin kúresten jarysta 79 kelide ekinshi oryn Ortalyq sport klýbynyń sportshysy Rústem Myrzaǵalıevqa buıyrdy. Qola júlde ıelengender – Meıirjan Áshirov (70 keli) pen Dáýlet Temirjanov (57 keli).
Sportshylar da osy múmkindikti paıdalanyp, QR Qorǵanys mınıstrligi men Qarýly kúshterdiń basshylyǵyna sportty damytýǵa qoldaý kórsetkeni úshin alǵys bildirdi.
Búgingi tańda áskerı sportshylar túrli deńgeıdegi 140-tan astam is-sharaǵa qatysty. Jyl basynan beri halyqaralyq jáne respýblıkalyq jarystarda OSK sportshylary 340 medal enshiledi. Jalpy sany 171 altyn, 82 kúmis jáne 87 qola medal aldy.
