Sýretti túsirgen – Nurbek IHSAN
Almaly aýyldyq okrýgine qarasty Atameken aýyly – Atyraý – Oral tasjoly boıynda ornalasqan, 120 otbasy, alty júzdeı halqy bar eldi meken. Kógildir otyny, taza sýy, elektr jelisi tartylǵan, malyn baǵyp, baý-baqshasyn salyp otyrǵan el. Tanymal Taıpaq qarbyzy osy aýylda ósedi. Aýyl turǵyndarynyń 60 paıyzy baý-baqsha ósirýmen aınalysady. Munda jyl saıyn jańa úı salynyp, aýyl tez ósip keledi. Belgili ólketanýshy Jánibek Ábilpeıisov ashqan «Jeruıyq» mýzeıi de osy jerde. Atamekenniń basty muqtajy – mektep ǵımaraty edi. Sonaý 1965 jyly aýyl turǵyndary asar jasap balshyq ılep salǵan mektep ábden tozyp, qulaǵaly turǵan. Áý basta bala sanyna baılanysty basynda bastaýysh bolsa, 1989 jyldan ortalaý mektepke aınalyp, al 2017 jyldan beri jalpy orta bilim beretin mektep dárejesine kóterilgen Mahambet О́temisuly atyndaǵy bilim ordasyna jańa ǵımarat aýadaı qajet edi. Bul jóninde «Atameken oqýshylary mektep suraıdy» degen maqalamyz gazetke sonaý 2021 jyly shyqqan eken.
Mine, aýyl halqy taǵatsyzdana kútken kún jetti. Atamekendikter úshin aq túıeniń qarny jaryldy desek te bolar. Halyqtyń qýanyshyna ortaqtasýǵa Batys Qazaqstan oblysy ákiminiń orynbasary Qalııar Aıtmuhambetov arnaıy keldi. «El Prezıdentiniń Joldaýdaǵy tapsyrmalaryna sáıkes, oblys kóleminde 27 mekteptiń qurylysy bastalǵan bolatyn. Sonymen qatar «Jaıly mektep» ulttyq jobasy aıasynda 18 bilim nysanynyń qurylysy josparlanyp, onyń 9-y boıynsha bıyl jumys bastaý aldy», dedi Q.Aıtmuhambetov.
Jańa ǵımarattyń lentasyn ardager-ustazdar Amangeldi Janaıysov pen Qymbat Orazova qıdy. Osy mektepte 20 jylǵa jýyq dırektor bolǵan A.Janaıysov bir jyl ishinde qurylysty sapaly aıaqtaǵan «JaıyqSelStroı» seriktestiginiń jumysshylaryna alǵys aıtty. Merdiger kompanııa dırektorynyń orynbasary Erlan О́zbekov sóz sóılep, M.О́temisov atyndaǵy orta mekteptiń dırektory Bolat О́teshevke sımvoldyq kiltti tabystady.
Chapaev aýyldyq okrýgine qarasty Jaıyq aýylyndaǵy negizgi mekteptiń ashylý saltanatyna da aýyl halqy qýanyshpen jınaldy. Bir aýysymda 60 oqýshy bilim alatyn bul mekteptiń jobalyq quny – 606,2 mln teńge. «Qarashyǵanaq Petroleým opereıtıng b.v.» kompanııasynyń tapsyrysymen qurylysty qolǵa alǵan «Aqsaıstroıservıs ı K» seriktestigi óz mindetin bir jylǵa jetkizbeı oryndap shyqty. Saltanatty jıyn ústinde kompanııa basshysy Orynbasar Qushev sımvoldyq kiltti mektep dırektory Merýert Ermentaevaǵa tabys etti.
Aıta keteıik, 2022 jylǵy qaraly qańtar oqıǵasy kezinde Almaty qalasynda qaza tapqan Sándibek Haıyrov osy aýyldyń týmasy bolatyn. Jaıyq negizgi orta mektebiniń jańa ǵımaratynda Sándibek Ǵalımollauly atyndaǵy «Erlik synyby» ashyldy. Erlik synybynyń lentasyn batyrdyń ákesi Ǵalımolla Nursaıynuly men ustazy Sáýle Ǵalymqyzy qıdy. Jańa kabınette jaıyqtyq ofıser, II dárejeli «Aıbyn» ordeniniń ıegeri Sándibek Qaıyrov atyndaǵy patrıottyq klýb jumys isteıtin bolady.
Jańa mektepte budan bólek 8 oqý kabıneti, uldar jáne qyzdar sheberhanasy, sportzal, kitaphana, ashana, medısına kabıneti bar.
Batys Qazaqstan oblysy
