Ulttyq parkke kirýdiń jańa tarıfi

Sonymen, 2024 jyly ulttyq park aýmaǵyna kirgeni úshin alynatyn alym mynadaı kólemde belgilendi: jaıaý júrginshige – 0,1 AEK (369 teńge); motosıkl, moped, kvadrosıkl úshin – 0,2 AEK (738 teńge); jeńil avtokólikke – 0,3 AEK (1 108 teńge); syıymdylyǵy 16 orynǵa deıingi shaǵyn avtobýs pen júk kóligine – 1 AEK (3 692 teńge); 32 orynǵa deıingi avtobýstarǵa – 2 AEK (7 384 teńge); 32-den asa oryndyqty avtobýsqa – 3 AEK (11 076 teńge).

Erekshe qorǵalatyn tabıǵı aýmaq­tarda ornalasqan eldi mekenderde tura­tyn jáne sol jerde ornalasqan saıajaı­lary bar jeke tulǵalar tólemnen bosatylady. Býrabaı, Bulandy jáne Eń­bek­shilder aýdandarynyń ulttyq park aýma­ǵynan tys ornalasqan eldi mekenderiniń halqy jalpy negizde aqy tó­leýge mindetti. Bul ulttyq parkpen irgeles jerlerde turatyndarǵa da qatysty.

1 qańtardan bastap jeke jáne zańdy tulǵalardyń avtokólik quraldarynan ulttyq park aýmaǵynda bolǵan árbir kúni úshin tólem alynady. Erekshe qorǵalatyn tabıǵı aýmaqtardy paıdalanǵany alym­nyń ashyqtyǵyn qamtamasyz etip, sybaılas jemqorlyq qaýpin azaıtý úshin «Býrabaı» memlekettik ulttyq parkinde 5 baqylaý-ótkizý beketi avtomattandyryldy. О́tkizý beketteriniń bári ekinshi deńgeıli bankterdiń tólem qyzmetine qosylǵan (kaspi.kz, homebank, Jusan). Iаǵnı tólemdi termınal arqyly da, banktik aýdarymmen de jasaýǵa bolady. Onlaın tóleý úshin bankterdiń QR-kodtary qoıylǵan. Kaspi.kz qosym­shasymen tóleý úshin shotyńyzdy aqy­ly joldardaǵy sııaqty aldyn ala toltyrýǵa bolady. Ondaı kezde ulttyq park­ten shyqqanda tólem avtomatty túrde esepshotyńyzdan alynady. Tólem banktik aýdarymmen de, qolma-qol da jasalady.

Osy oraıda baqylaý-ótkizý beketinde keptelis bolmaýy úshin marshrýtty aldyn ala josparlap, Býrabaı aýylyndaǵy ǵana emes, basqa da ótkizý beketterinen de shyǵýǵa bolatynyn eskerýlerińizdi suraımyz. Atap aıtqanda, №1 ótkizý beketi – Astana – Petropavl tas joly jaǵynda; №2 ótkizý beketi – Býrabaı aýylynda; №3 ótkizý beketi – Shýchınsk qalasy arqyly Shýchınsk – Býrabaı ký­rorttyq aımaǵyna kirer tusta; №4 ótkizý beketi – Memlekettik ulttyq park aýma­ǵyna Shýchınsk qalasynan «Baldáýren» oqý-saýyqtyrý ortalyǵy baǵytyndaǵy kireberiste; №5 ótkizý beketi – Qatarkól kóliniń janyndaǵy Prıozernyı orman sharýashylyǵynyń aýmaǵynda.

Tarıf «Erekshe qorǵalatyn tabıǵı aýmaqtar týraly» QR zańynyń 38-babyna oraı ózgerdi. Kólik quraldary adamdarǵa qaraǵanda qorshaǵan ortaǵa kóbirek zııan keltiretini (aýany lastaıdy, zııandy hımııalyq zattar taralady, dybysy qatty) eskerildi. Erekshe qorǵalatyn tabıǵı aýmaqtardaǵy tólem res­pýblıkalyq bıýd­jetke túsedi, «Býra­baı» MUTP-nyń mindetine ony tek jınaý kiredi.