«Kez kelgen eldiń Úkimeti strategııalyq mindetteri men kúndelikti jumysyn qosa atqarady. Bizde de solaı. Eń bastysy, tıimdi josparlaý jáne resýrstardy oryndy paıdalaný kerek. Úkimettiń qazirgi quramy byltyr kóktemde ǵana jasaqtaldy. Konstıtýsııalyq reforma jasalyp, Parlament saılaýy ótken soń aldyńǵy Parlamenttiń de, Úkimettiń de mandaty kúshin joıdy. Konstıtýsııaǵa sáıkes burynǵy Úkimet jańadan saılanǵan Májilis depýtattarynyń aldynda óz ókilettigin toqtatty. Saılaýda eń kóp daýys alǵan «Amanat» partııasy Premer-mınıstrdiń kandıdatýrasyn usyndy. Árıne, partııa muny Prezıdentpen aqyldasa otyryp júzege asyrǵanyn jasyrmaımyn. «Amanat» partııasynyń saılaý aldyndaǵy tuǵyrnamasynyń ekonomıkaǵa qatysty bóligi qazirgi Úkimettiń baǵdarlamasy negizinde jasaldy», dedi Prezıdent.
Memleket basshysy búginde Úkimettiń ókilettigi aıtarlyqtaı keńeıgenine de toqtaldy.
«Búginde Úkimettiń ókilettigi aıtarlyqtaı keńeıdi. Qyrkúıek aıynda qurylymy ózgergen Prezıdent Ákimshiligi elimizdiń áleýmettik-ekonomıkalyq damýyna qatysty strategııalyq baǵyttarǵa basa nazar aýdaratyn boldy. Endi Ákimshilik burynǵydaı Úkimetti, keıbir mınıstrlikter men vedomstvolardy jetelep júrmeıdi. Prezıdent Ákimshiligi atqarýshy bıliktiń qyzmetine aralaspaı, basty saıası shtab retinde ǵana jumys isteıdi. Osyǵan deıin eki organnyń da quzyrynda bolǵan birqatar ókilettik Úkimetke berildi. Túrli salaǵa qatysty sheshim qabyldaý quqyǵy Úkimetke jáne basqa da jaýapty organdarǵa ótti. Aımaqtardyń bıýdjetke qatysty derbestigi arta tústi.
Bir sózben aıtsaq, qazir Úkimettiń ónimdi jumys isteýi úshin múmkindikteri jetkilikti. Atqarýshy bılikke jan-jaqty oılastyrylǵan is-qımyl strategııasy jáne óz mindetin tıimdi júzege asyrýǵa degen ynta-jiger ǵana qajet. Derbestikke jáne qosymsha ókilettikke ıe bolýǵa umtylǵan Úkimet qalaǵanyn aldy. Biraq «almaqtyń da salmaǵy bar», olarǵa qoıylatyn talap ta kúsheıdi. Úkimet muny túsinýge tıis», dedi Qasym-Jomart Toqaev.
