Sýretti túsirgen – avtor
Jańa jyl qarsańynda Samar aýdanyna qarasty Mırolıýbovka aýlyna arnaıy baryp, mektep sport zalyndaǵy jóndeý jumystaryn kórgen edik. Iá, eden taqtaılaryn kedir-budyr etip tósegen. Keıbir tusyna jamaý salǵan. Qudaı saqtasyn, bala qulaǵan jaǵdaıda jaraqat alary anyq. Sondaı-aq jylý batareıalaryn qorshaǵan taqtaılary solqyldap tur. Juqa taqtaı dop tıse, mort synady. Onyń ústine ústiriktelmegen. Tóbedegi jaryq shamdary da arnaıy tormen qaptalmaǵan. Apattyq shyǵý esigin talapqa saı standarttan taryltyp tastaǵany bylaı tursyn, ashylmaıdy. Siresip jatyr. Alda-jalda tótenshe jaǵdaı bolyp, balalardy syrtqa shyǵarý kerek bolsa, bul esikten saý etip shyqqandy qoıyp, keptelip qalýy ábden múmkin.
«Eden taqtaılaryn salyp jatqan kezde birneshe ret eskerttik. Oǵan qaramastan, merdigerler jumysyn jalǵastyra berdi. Áýeli eski taqtaılardy almaı, ústinen salmaqshy bolǵan. Aıtyp júrip, aýystyrttyq. Biraq taqtaılar sý bolǵan. Saldarynan isinip, ashylyp ketip jatyr. Jumys sapasyz oryndalǵandyqtan, qabyldamaı otyrmyz. Munda balalardy kirgizip, oqys jaǵdaı oryn alsa, qaıtemiz? Sondyqtan mundaı jumysqa jaýapkershilik tanytpasa bolmaıdy», deıdi mektep dırektory Janat Bolatbekqyzy.
Dırektordyń sózin aýyl aqsaqaldary, ata-analar da rastap otyr. Jumystyń sapasyz júrgizilgendigin aıtyp, kemshilikti dereý joıý kerek desedi.
«Ekinshi toqsan aıaqtaldy, deneshynyqtyrý páni ótpedi. Burynǵy edeni tura berýi kerek edi. Al myna tósegen taqtaılary qashanǵa deıin shydaıdy, kim bilsin? Jalpy, aýyldyq jer bolǵandyqtan, jastardyń da keshkilik dop oınaıtyn jeri – osy sport zaly. Qazir olardy qoıyp, mektep oqýshylary sport zalǵa kire almaı júr. Balamnyń aıtýynsha, deneshynyqtyrý sabaǵynda tennıs nemese doıby oınaıdy», deıdi ata-ana Olga Djýlaı.
Aıtsa aıtqandaı, aýyl jastarynyń keshkilik sport zaldan basqa barar jerleri joq. Jastarǵa, oqýshylarǵa aınaldyrǵan jalǵyz sport zaldy sapaly etip jóndep bere almaı otyryp, basqa qoldaýdy qalaı kórsetpek? Sóıte júrip, aýylda jas qalmaı barady dep áldekimdi synaǵymyz keledi. Mektep dırektory J.Bolatbekqyzynyń aıtýynsha, bilim oshaǵyna aýyl jastary únemi demeýshilik kórsetip otyrǵandyqtan, sport zalǵa kirýge ruqsat bergen-di. Bıyl ǵana yryń-jyryń bolǵan jóndeý jumystarynan soń, problema týyndap otyr.
Áýelde aǵymdyq jóndeý jumysy smetalyq qujat boıynsha 11 mln teńgege eseptelgen. Al memlekettik tapsyrys portalynda «MEGA-STR» merdiger kompanııasy somany 6 mln 880 myń teńgege túsirip, utyp alǵan.
«Edenniń búlinýi ylǵaldyń joǵary bolýynan oryn alyp otyr. Sebebi dál sol ýaqytta shatyrdy jóndep jatqan. Shatyr ashyq bolǵandyqtan, kúzgi jańbyr kezinde edenniń qurylys materıaldaryna sý tıgen. Onyń ústine jylý júıesi de qosylmaǵan edi. Ekinshiden, kemshilikter týraly qaǵaz júzinde habarlamaǵan. Alǵashynda kem-ketik tustaryn qalpyna keltirip otyrdyq. Jalpy, sport zaldaǵy aǵymdyq jóndeýdiń kepildigi bar. Belgilengen merzim ishinde qandaı da aqaýlar shyǵyp jatsa, biz jóndep beremiz», deıdi «MEGA-STR» kompanııasynyń ókili Baqytbek Ilııasov.
Kompanııa ókili aıtqandaı, jumystyń 80 paıyzyn qabyldap alý jónindegi qujattarǵa qol qoıylǵan kórinedi. Alaıda mektep basshylyǵy qol qoıýdan bas tartqanyn aıtady. Túsingenimizdeı, qalǵan jumystyń kemshilikteri jóninde tapsyrys berýshi tarap qaǵaz júzinde habardar etse, merdiger kompanııa qalpyna keltirip berýden bas tartyp otyrǵan joq. Biraq shym-shytyryq qaǵaz jumystary qashanǵa deıin sozylady? Bárinen buryn mektep basshylyǵy baǵdarlamaǵa saı deneshynyqtyrý pánine qatysa almaı júrgen oqýshylarǵa ne dep aqtalady? Doıby men ústel tennısinen jalyqqan oqýshylar bir ýaqyt júgirgisi keledi, voleıbol, basketbol oınasaq desedi. О́kinishke qaraı, sport zaly kem-ketiksiz qaıta qashan jóndeledi, belgisiz.
Shyǵys Qazaqstan oblysy,
Samar aýdany
