Bul QR et satylatyn oryndarǵa ornalastyrylady, ol janýarlardy veterınarııalyq tekserýsiz jáne et pen organdardy teksermeı mal soıýdyń aldyn alýǵa múmkindik beredi. Jańa modýl Almaty, Pavlodar, Jetisý oblystarynda qanatqaqty rejimde synalyp jatyr.
Bul tásil shekaralyq ótkizý beketterinde de engizildi. Kelip túsken júkter týraly málimetter aqparat júıesine engiziledi, tekserý jáne synama alý aktileriniń elektrondyq nusqasyn qalyptastyrady, olar memlekettik veterınarııalyq ınspektorǵa jáne veterınarııalyq zerthana qyzmetkerine jiberiledi. Júıe Pavlodar oblysynyń shekara mańyndaǵy beketterinde testileýden sátti ótti.
«El aýmaǵynda mal soıatyn 904 nysan bar, onyń ishinde 109-y – et óńdeý kásiporny, 281-i – mal soıý pýnkti jáne 514 mal soıý alańy. Veterınarııalyq talaptarǵa sáıkes kelmegendikten, 106 mal soıý nysany jabyldy, 2023 jylǵy qańtar-qazan aılary aralyǵynda 661 mal soıý alańynyń esep nómirleri keri alyndy», dedi aýyl sharýashylyǵy vıse-mınıstri Amangalıı Berdalın.
Sonymen qatar vıse-mınıstr barlyq iri aýyldyq okrýgte veterınarııalyq-sanıtarııalyq saraptama zerthanasy bar mal soıý pýnktterin ashý qajetin atap ótti.
– Mal soıý alańdary ótpeli kezeńde májbúrli shara retinde ashylǵandyqtan, qazir zańnamaǵa ózgerister engizý maqsatynda jumys istep jatyrmyz, sodan keıin mal soıý alańdary joıylatyn bolady, – dedi aýyl sharýashylyǵy vıse-mınıstri.
Sonymen qatar keńeste Amangalıı Berdalın Qazaqstan aýmaǵynda janýarlar men qustardy jospar boıynsha dıagnostıkalaý jáne vaksınalaý týraly aıtty. Dıagnostıkalyq jáne profılaktıkalyq is-sharalar týraly barlyq málimet AShJB bazasyna engizilgen. Nátıjesinde, keıingi jyly elimizde qaýipti aýrý oshaqtary 38%-ǵa tómendegen.
Shegirtkege qarsy kúreske daıyndyq týraly aýyl sharýashylyǵy vıse-mınıstri Azat Sultanov baıandady. Keıingi jyldary Aqtóbe jáne Qostanaı oblystarynda zııankesterdiń taralý alańdary ósti (1 mln ga nemese respýblıka boıynsha jalpy alańnyń 69%-y). 2023-2024 jyldary shegirtke taralýynyń 11 jyldaǵy rekordtyq kórsetkishi oryn alyp otyr. Egistik jerlerdi shegirtkeden ýaqtyly saqtaý úshin aldyn ala memlekettik satyp alý jospary jasalyp, konkýrstar jarııalandy. Ońtústik óńirlerde qajetti jumystardy sáýir aıynda, soltústikte mamyrda bastaý josparlanyp otyr.
Keńes qorytyndysy boıynsha Serik Jumanǵarın Aýyl sharýashylyǵy mınıstrligine oblys ákimdikterimen birge mal soıýdaǵy jańashyldyqtar, olardyń artyqshylyqtary boıynsha turǵyndar arasynda keń aýqymdy aqparattyq jumys júrgizýdi tapsyrdy. Sondaı-aq egistik jerlerdi shegirtkeden ýaqtyly óńdeý úshin barlyq qajetti prosedýrany jedel júrgizýdi tapsyrdy.
