Foto: Baq.kz
Bıylǵy jyldyń basty sporttyq sharasy – Parıjdegi jazǵy Olımpıada oıyndary. Bul doda 26 shilde men 11 tamyz aralyǵynda álemniń 205 elinen kelgen 10 myńnan astam sportshynyń qatysýymen ótedi. Tórt jyldyqtyń jarysynda sporttyń 32 túrinen 329 medal jıyntyǵy sarapqa salynady. Qazaqstan ulttyq quramasy sporttyń 20 túrinen qatysýdy josparlap otyr. Búgingi tańda jerlesterimizde sporttyń 8 túri boıynsha (sadaq atý, veloshosse, oq atý, qazirgi bessaıys, grek-rım kúresi, erkin kúres, sporttyq gımnastıka jáne boks) 17 lısenzııa bar. Alda 90-ǵa jýyq lısenzııalyq jarys kútip tur. Sondyqtan joldamalar sanyn áli de kóbeıtý kózdelgen.
Elimiz úshin jyldyń mańyzdy tarıhı oqıǵasy – elordada V Dúnıejúzilik kóshpendiler oıyndaryn uıymdastyrý jáne ótkizý. Osy jyldyń 8-14 qyrkúıek aralyǵynda Qazaqstanǵa álemniń 100-den astam elinen delegasııalar keledi dep josparlanyp otyr. Oıyndardyń biregeıligi – sporttyq, mádenı jáne ǵylymı baǵdarlamalardyń ushtasýynda. Baǵdarlamaǵa 20 jarystyq jáne 10 kórneki sport túri kirip, 110 medal jıyntyǵy júldegerler enshisine buıyrady. Jarys at sporty, ulttyq kúres, sadaq atý, qustarmen ań aýlaýdyń túrleri, dástúrli zııatkerlik oıyndar boıynsha ótedi. Qazirgi ýaqytta ulttyq qurama daıarlyqty bastady, komandalar quramy jasaqtalyp, oqý-jattyǵý sharalary ótkizilip jatyr.
Bıyl Astanada áıelder arasyndaǵy bokstan álem chempıonaty ótedi. Bul týraly Tashkentte (О́zbekstan) ótken Halyqaralyq boks qaýymdastyǵynyń (IBA) resmı otyrysynda habarlandy. IBA Federasııasy prezıdentiniń aıtýynsha, týrnırdiń jalpy júlde qory 4,8 mıllıon AQSh dollaryn quraıdy. Álem chempıony atanǵan boksshy 200 000 AQSh dollaryn alady.
Sondaı-aq 2024 jyldyń qarasha aıynda Astana qalasynda sambodan álem chempıonatyn ótkizý josparlanǵan. О́tken jyly kúzde Erevanda ótken sambodan 48-shi álem chempıonatyna 65 el qatysyp, jalpy esepte Qazaqstan quramasy 1 altyn, 2 kúmis jáne 5 qola ıelenip úshinshi orynǵa taban tiredi.
