О́ńirlik tótenshe jaǵdaılar departamenti baspasóz qyzmetiniń habarlaýynsha, oqıǵa 4 qańtar kúni saǵat 01.25 shamasynda «Maıqaıyńaltyn» AQ aýmaǵynda, altyn kenishi shahtasynyń janyndaǵy tazartý keńistiginde oryn alǵan. «Kenish aýmaǵyndaǵy jerasty shahtasynyń topyraq qabaty opyrylyp túsip, paıda bolǵan oıyqqa júrip bara jatqan avtobýs qulaǵan. Apat kezinde avtobýsta 4 adam bolǵan. Olar – kásibı áskerılendirilgen avarııalyq-qutqarý qyzmetteriniń respýblıkalyq ortalyq shtaby Pavlodar fılıalynyń 3 qutqarýshysy men kólik júrgizýshi. Shahtadan 33 jumysshy evakýasııalandy, olardyń ómiri men densaýlyǵyna qaýip tóngen joq. Shahta ústinde paıda bolǵan oıyqtyń aldyn ala uzyndyǵy 150-200 metr, eni jarty shaqyrym, tereńdigi 150 metr. Oqıǵa ornynda jedel shtab uıymdastyryldy. Pavlodar oblysynyń ákimi Asaıyn Baıhanov, TJD men jergilikti atqarýshy organdardyń basshylyǵy oqıǵa ornynda júr. Psıhologter jumys júrgizilip jatyr. Avarııalyq-qutqarý jumystaryna «Maıqaıyńaltyn» AQ kásibı áskerılendirilgen avarııalyq-qutqarý qyzmetteri Pavlodar fılıalynyń, jergilikti atqarýshy organdardyń kúshteri men quraldary, sondaı-aq TJ departamentiniń qutqarýshylary tartylǵan. Barlyǵy 73 adam, 17 tehnıka men bir ushqyshsyz ushý apparaty (dron) jumyldyryldy» delingen resmı habarlamada.
Kýágerlerdiń aıtýynsha, 3 qańtar kúni altyn shahtasynda jappaı ken jynystaryn jarý jumystary júrgizilgen. Al tún ortasyna taman altyn kenishindegi kezekshi shahta ishindegi áldebir shýdy qulaǵy shalyp, qutqarýshylarǵa, ıaǵnı kásibı áskerılendirilgen avarııalyq-qutqarý qyzmetteriniń respýblıkalyq ortalyq shtaby Pavlodar fılıalynyń ókilderine habarlaǵan. Shaqyrtý kelip túsken boıda qyzmettik avtobýsqa 3 qutqarýshy kelip minedi. Kenishtiń jer astyndaǵy shahtalary «voronka» ádisimen oıylyp, biriniń ústinen biri salynyp otyrady. Álgi jappaı jarý jumystarynyń saldary boldy ma eken, sol kúni túnde shahta ústindegi topyraq qabattary tómen qulap, jer ústinde úlken oıyq paıda bolǵan. Alaıda kenish qyzmetkerleri ony qarańǵyda baıqamaı qalǵan tárizdi. Kenishke aparatyn jol sol aýmaqty basyp ótedi. Shaqyrtýǵa bet alǵan avtobýs kenetten paıda bolǵan oıyqqa tap bolyp, tómen qulaǵan.
Keshe tústen keıin kásibı áskerılendirilgen avarııalyq-qutqarý qyzmetteriniń respýblıkalyq ortalyq shtaby topyraq astynan 2 qutqarýshynyń múrdesi qazyp alynǵanyn habarlady.
Oqıǵa ornynda júrgen Pavlodar oblysynyń ákimi Asaıyn Baıhanov keshkisin habarlaǵandaı, avtobýs ishinde bolǵan qutqarýshylardy izdeý jumystary qıynǵa soqqan. Oıyq shetindegi topyraq pen tastar qaıta-qaıta úgilip, qutqarýshylarǵa kedergi keltirdi.
– Qutqarý jumystarymen shuǵyldanyp júrgen azamattardyń ómirine qaýip tónbes úshin oıyqtyń aınalasy bekitildi. Qutqarýshylar qırandy astynan 2 azamattyń máıitin alyp shyqty. Olar – Sarqyt Berdiqan (1999 jylǵy) jáne Tyshkevıch Oleg Leonıdovıch (1970 jylǵy). О́zge eki qutqarýshyny izdeý jumystary jalǵasyp jatyr. Avtobýs tabylǵan joq, – dep habarlady óńir basshysy.
Oqıǵanyń sebep-saldaryn Tótenshe jaǵdaılar mınıstrligi О́nerkásiptik qaýipsizdik komıtetiniń tóraǵalyq etýimen qurylǵan arnaıy komıssııa anyqtaý ústinde.
Pavlodar oblysy,
Baıanaýyl aýdany,
Maıqaıyń kenti
