Bekbolat – Batys Qazaqstan oblysy Shyńǵyrlaý aýdanynyń týmasy. Qazir Astanada turady. Kóziniń qarashyǵyndaı úsh perzenti bar. Úlkeni – jetide, kenjesi – úshte. Kúndelikti turmys-tirshiliktiń qamymen júrgen ol 2020 jyly aqpanda jaǵdaıy nasharlaı bastaǵan soń emhanaǵa baryp, búıregi asqynǵanyn biledi. Aýrýdyń emi – transplantasııa. Oǵan deıin gemodıalız alýǵa týra keledi.
– 2020 jyldan beri gemodıalız ala bastadym. Ýaqyt óte aptasyna úsh márte qabyldap júrdim. Ár barǵanda tórt saǵat jatamyz. Biraq gemodıalızden birde ózimdi jaqsy, keıde óte nashar sezinip shyǵatynmyn. Alǵashynda gemodıalızdiń tek bir ǵana túri bar, ony bir ǵana fırma tasymaldaıdy dep oılaıtynmyn. Sóıtsem, túri kóp eken. Onyń bızneske aınalyp ketkenin keıin bildim. Meniń aǵzama jaqsy áser etken gemodıalızge toqtalyp, tek sony alatyn boldym. Kóp uzamaı Astanadaǵy Ulttyq onkologııa ortalyǵyna baryp, onda Mels Asyqbaev esimdi tájirıbeli transpalantolog dárigermen jolyqtym. Transplantologııa, donorlyq týraly aqparat suraı bastadym. Olar transplantasııa máıittik donor nemese týystyq donordyń kómegimen jasalatynyn aıtty. Máıittik donorǵa «kútý paraǵyna» kezekke turdym. Emdelip júrgende kóptegen adammen tanystym. Gemodıalızge 15, 17 jyl qatynaǵandar bar eken. Elde máıittik donor az ekenin sol sátte túsindim, – deıdi Bekbolat.
Sodan keıipkerimiz eldegi máıittik donordyń tapshylyǵyna nendeı másele áser etetinin anyqtaǵysy kelip, izdengen. Máıittik donorlyqqa qarsy otbasylardyń kóp ekenin bilgen. Dinı turǵyda qaıshylyqtar bar degendi estigen. Biraq keıin osy saýaldy qaladaǵy bir meshittiń ımamyna qoısa, ol qaıtyp bara jatqan adam ekinshi adamdy qutqarǵany saýapty is ekenin jetkizipti. Qysqasy, dinde qarsylyq joǵyn túsingen. Bul mezgilde Bekbolattyń otbasy da gemodıalızde júrýdiń qıyndyǵyn kórip, bilip qalǵan. Dárigerler jiti tekserýden keıin naýqastyń jubaıynyń aǵzasy transplantasııaǵa keletinin bilip, erli-zaıyptylar operasııaǵa qamdana bastaǵan.
– Transplantasııadan aldyn dárigerler jubaıymyz ekeýmizdiń densaýlyǵymyzdy muqııat baqylady. Donor bolý – árıne, ońaı dúnıe emes. Bul erlikpen parapar is der edim. Ulttyq onkologııa ortalyǵynyń transplantologi Mels Asyqbaev bastaǵan dárigerler qaýymyna alǵysym sheksiz. Bizge transplantasııadan qorqyp, sary ýaıymǵa salynýdyń qajeti joǵyn baıyppen túsindirdi. Kún-tún demeı pasıentterdiń jaǵdaıyn baqylap júretin. Jańylmasam, operasııa 5 saǵatqa sozylsa kerek, odan keıin de biraz ýaqyt aýrýhanada jattyq. Qazir úıge shyǵyp, dári-dármekterimizdi úzbeı ýaqtyly iship júrmiz. Buıyrsa, jaǵdaıymyz ábden jaqsaryp jatsa, donorlyq týraly aqparattandyrý jumystaryna da belsendi aralassaq degen oıymyz bar. О́ıtkeni men sekildi búıregi aýyryp, gemodıalızge tańylǵandardyń ahýalyn jaqsy túsinemin. Elde máıittik donor damyǵanda jaǵdaıy múshkil naýqastar azaıar ma edi dep oılaımyn, – deıdi B.Shernııazov.
Elimizde transplantasııa týystyq nemese máıittik donordan jasalady. Alaıda týystyq donorlyqqa kelisim berýge de á degennen ekiniń-biriniń batyly bara qoımas. Keıipkerimiz donorlyqty erlikke balaıtynyn aıtyp, erlik jasaǵandarǵa qoǵam bolyp qurmet kórsetýge shaqyryp otyr. Ol et jaqynyna aǵzasyn berip, aman alyp qalǵan jandarǵa arnaıy tósbelgi tabystap, úlgi etýimiz kerek dep sanaıdy. Úkimet qoldasa, qoǵamdyq oryndarda jeńildikter qarastyrylsa, halyqtyń donorlyqqa kózqarasy ózgerer edi degen oıyn ashyp aıtty. Áleýmettik jelide erli-zaıyptylarǵa habarlasyp, donorlyq týraly keńes suraıtyndar kóbeıgen.
Iá, elde transplantologııa salasy táp-táýir damyp keledi. Bilikti dárigerler de barshylyq. Týystyq donordyń kómegimen jasalatyn operasııalar jyldan-jylǵa kóbeıe tústi. О́kinishtisi, máıittik donordyń áli de bolsa, aqsap turǵany. Muny basqa-basqa Bekbolat Shernııazov jaqsy biledi. Aýyr jaǵdaıda jatqan naýqastardyń talaıyn kórgen ol úgit-nasıhatqa kómektesýge ár kez daıyn ekenin jetkizdi. Biz de erli-zaıyptylardyń emi shıpaly bolsyn desip, transplantologııa salasyn damytýǵa demeý bolarlyq ıgi isterine tabys tiledik.
